শুকুৰবাৰে অসম নাগৰিক সন্মিলনে গুৱাহাটী প্ৰেছক্লাৱত এক সংবাদমেল সম্বোধন কৰে। অহা ২৩ আগষ্ট আৰু ৭ ছেপ্তেম্বৰত ক্ৰমে নগাঁও আৰু ঢেকিয়াজুলীত অনুষ্ঠিত হ’বলগা নাগৰিক সন্মিলনৰ বিষয়ে সংবাদমেলত অৱগত কৰা হয়। ইয়াৰ উপৰিও অহা ২৪ আগষ্টত লক্ষীৰাম বৰুৱা সদনত বিয়লি ২:৩০ বজাত অনুষ্ঠিত হ’বলগা “দেশৰ সাম্প্ৰতিক অৱস্থা আৰু অসমৰ বিশেষ পৰিস্থিতি” শীৰ্ষক ৰাজহুৱা সভাৰ বিষয়েও জনোৱা হয়। সংবাদমেলৰ পিছত অসম নাগৰিক সন্মিলনে এক বিবৃতি প্ৰকাশ কৰে। উক্ত বিবৃতিটো তলত সংলগ্ন কৰা হ’ল।
আমাৰ দেশখনক ক্ষমতাসীন দলটোৱে কেনেদৰে এটাৰ পাছত এটা সংকটলৈ ঠেলি দিছে। অসমতো একেই ঘটনা। ভাৰতৰ ৰাজনীতিত যোৱা সময়ছোৱাত আমি লক্ষ্য কৰা দুটা গুৰুত্বপূৰ্ণ প্ৰৱনতা হ’ল- বিভাজনবাদী ৰাজনীতিয়ে সৃষ্টি কৰা সাম্প্ৰদায়িক উত্তেজনা আৰু এক বৃহৎসংখ্যক লোকক তেওঁলোকৰ ভোটাধিকাৰৰ পৰা বঞ্চিত কৰাৰ ষড়যন্ত্ৰ। আচলতে, ই সংখ্যাগুৰুৰ ৰাজনীতি সংহত কৰা এটা মুদ্ৰাৰে দুটা পিঠি। ইয়াৰ লগত আমি আৰু এটা কথা যোগ দিব পাৰোঁ। সেইটো হৈছে, ৰাজহুৱা সম্পদ চৰকাৰে ভালপোৱা এমুঠিমান বহুজাতিকক গটাই দিয়া যিয়ে সাধাৰণ মানুহৰ পানীত হাঁহ নচৰা অৱস্থা কৰিছে৷ আনফালে কোনোবাই যদি এইবোৰৰ বিৰোধিতা কৰে তেওঁলোকৰ কণ্ঠ ৰুদ্ধ কৰিবলৈ চৰকাৰ সততে তৎপৰ৷ তাৰ শেহতীয়া উদাহৰণ হৈছে- কেবল তথ্যভিত্তিক প্ৰতিবেদন প্ৰকাশ কৰা বাবে দেশৰ তিনিগৰাকী প্ৰখ্যাত সাংবাদিক সিদ্ধাৰ্থ ভৰদাৰাজন, কৰণ থাপৰ আৰু অভিষাৰ শৰ্মাৰ বিৰুদ্ধে দাখিল কৰা এজাহাৰ। সকলো বিৰোধী দল, নাগৰিক সমাজ আৰু জনসাধাৰণ ঐক্যবদ্ধ হ’লেহে দেশে সন্মুখীন হোৱা এই বিপদজনক পৰিস্থিতিৰ সৈতে আমি মোকাবিলা কৰিব পাৰিম আৰু তাক বাধা দিব পাৰিম৷ অসম নাগৰিক সন্মিলনৰ উদ্যোগত তেনে এক প্ৰচেষ্টাই লোৱা হৈছে৷ বিশিষ্ট বুদ্ধিজীৱী ডঃ হীৰেন গোহাঁইৰ নেতৃত্বত ছজনীয়া ব্যক্তিৰ দল এটাই যোৱা ছমাহে অসমৰ সকলো বিৰোধী ৰাজনৈতিক দলক ঐক্যবদ্ধ কৰাৰ বাবে চেষ্টা চলাই আছে। ইতিমধ্যে যোৱা জুলাই মাহত গুৱাহাটীত এখন বৃহৎ নাগৰিক অভিৱৰ্ত্তনৰো আয়োজন কৰা হৈছিল য’ত আটাইকেইটা বিৰোধী ৰাজনৈতিক দলৰ নেতৃবৃন্দই অংশ গ্ৰহণ কৰিছিল। পৰৱৰ্তী পৰ্যায়ত একেই উদ্দেশ্যেৰে অসমৰ বিভিন্ন ঠাইত আঞ্চলিক অভিৱৰ্ত্তনৰো আয়োজন কৰা হৈছে। ইয়াৰে প্ৰথমখন কাইলৈ নগাঁৱত, দ্বিতীয়খন যোৰহাটত অহা ৭ ছেপ্তেম্বৰত আৰু তাৰ পাছত তৃতীয়খন ১৪ ছেপ্টেম্বৰত ঢেকিয়াজুলিত অনুষ্ঠিত হ’ব। এনেদৰে ৰাজ্যখনৰ সকলো জিলাকে সামৰি আঞ্চলিক নাগৰিক অভিৱৰ্তন অনুষ্ঠিত কৰাৰ প্ৰক্ৰিয়া চলি আছে । আমি সকলো নাগৰিক সমাজ, বিৰোধী ৰাজনৈতিক দল আৰু সাধাৰণ জনতাক এই আঞ্চলিক অভিৱৰ্তনবোৰৰ প্ৰতি সমৰ্থন আগবঢ়াই সেই বোৰ সফল কৰি তুলিবলৈ আহ্বান জনাইছো।
অন্য এটা উল্লেখযোগ্য ঘটনা হৈছে ২৪ আগষ্টত লক্ষীৰাম বৰুৱা সদনত বিয়লি ২:৩০ বজাত “দেশৰ সাম্প্ৰতিক অৱস্থা আৰু অসমৰ বিশেষ পৰিস্থিতি” শীৰ্ষক ৰাজহুৱা সভাখন৷ এই ৰাজহুৱা সভাখনত ভাৰতৰ বিশিষ্ট লেখক- বুদ্ধিজীৱীৰ দল এটাই অংশগ্ৰহণ কৰিব৷ এই দলটিত থাকিব- উচ্চতম ন্যায়ালয়ৰ অধিবক্তা প্ৰশান্ত ভূষণ, ভাৰতৰ প্ৰাক্তন মুখ্য তথ্য আয়ুক্ত ওৱাজাহাট হাবিবুল্লাহ, পৰিকল্পনা আয়োগৰ প্ৰাক্তন সদস্য, ছায়েদা হামিদ, প্ৰচাৰ ভাৰতীৰ প্ৰাক্তন মুৰব্বী, জোহৰ ছিৰকাৰ আদি। সকলোকে ৰাজহুৱা সভালৈ আমন্ত্ৰণ জনোৱা হ’ল।
অসম নাগৰিক সন্মিলনৰ হৈহীৰেন গোহাঁই, হৰেকৃষ্ণ ডেকা, অজিত কুমাৰ ভূঞা, পৰেশ মালাকাৰ, আব্দুল মান্নান, শান্তনু বৰঠাকুৰ
