মুখ্যমন্ত্ৰী হিমন্ত বিশ্ব শৰ্মাৰ পৰিকল্পনা আৰু কৌশল অনুসৰিয়ে এপিএছচিত কেলেংকাৰীৰে চাকৰি লোৱা নিলম্বিত বিষয়াসকলে চাকৰি ঘুৰাই পোৱাৰ পৰিৱেশ সৃষ্টি হ’ল। ভাৰতৰ গণতান্ত্ৰিক যুৱ ফেডাৰেছন চমুকৈ ডি ৱাই এফ আইৰ অসম ৰাজ্যিক কমিটিয়ে এই ঘটনাৰ তীব্ৰ প্ৰতিবাদ জনাইছে আৰু ইয়াৰ বাবে মুখ্যমন্ত্ৰীকেই প্ৰত্যক্ষভাৱে জগৰীয়া বুলি অভিহিত কৰিছে।
আচৰিত কথা যে আদালতে নিজাববীয়াকৈ গোচৰ লোৱা ৯ গৰাকী বিষয়াই আজিও চাকৰি কৰি থাকিবলৈ সক্ষম হৈছে। এই বিষয়াসকল হৈছে নৱনীতা শৰ্মা, অসীমা কলিতা, অমৃতৰাজ চৌধুৰী, ত্ৰিদীপ ৰয়, ঋতুৰাজ দলে, জগদীশ ব্ৰহ্ম, বিক্ৰম আদিত্য বৰা, নন্দিতা হাজৰিকা আৰু স্বৰূপ কুমাৰ ভট্টাচাৰ্য।
এয়া অভূতপূৰ্ব ঘটনা বুলি অভিহিত কৰি ডি ৱাই এফ আইয়ে কয় যে- ন্যায়ালয়ৰ নিৰ্দেশত গঠন হোৱা “বিপ্লৱ কুমাৰ শৰ্মা আয়োগ”ৰ প্ৰতিবেদন দীৰ্ঘদিনে ৰাজহুৱা নকৰি, নিজৰ পচন্দৰ ব্যক্তিৰে এছ আই টি গঠন কৰি সমগ্ৰ বিচাৰ প্ৰক্ৰিয়াক দীঘলীয়া কৰিছে আৰু এপিএছচিত কেলেংকাৰীৰে বাছনিকৃত হোৱা বিষয়াসকলক ৰক্ষণাবেক্ষণ দিয়াৰ কৌশল মুখ্যমন্ত্ৰী হিমন্ত বিশ্ব শৰ্মাৰ নেতৃত্বতে চলিছে আৰু ৰূপায়িত হৈছে।
আৰক্ষীৰ তদন্ত আৰু ন্যায়িক আয়োগৰ অনুসন্ধানত এপিএছচিৰ ভয়াবহ কেলেংকাৰীৰ তথ্য পোহৰলৈ আহিছিল যদিও আজিলৈকে ন্যায়িক আয়োগৰ প্ৰতিবেদন মুখ্যমন্ত্ৰী শৰ্মাই ৰাজহুৱা নকৰিলে।
বাছনি পৰীক্ষাত হোৱা গুৰুতৰ অনিয়মৰ তথ্য পোহৰলৈ অহাৰ পাছতো চৰকাৰে তেনে অভিযুক্তক চাকৰিৰ পৰা নিলম্বন কৰিয়ে দায়িত্ব সামৰিছে। এনে নিলম্বিত বিষয়াৰ শেহতীয়াকৈ চাকৰিত পুনৰ যোগদানৰ পথ মুকলি হৈছে। অভিযোগ উঠিছে যে চৰকাৰী অধিবক্তাই আদালতৰ মজিয়াত লোৱা ৰহস্যজনক স্থিতিৰ বাবে এনে ঘটনা ঘটিবলৈ পাইছে।
দুৰ্নীতিৰে বাছনীকৃত হোৱা এইসকল বিষয়াই যদি সঁচাকৈ পুনৰ যোগদান কৰিবলৈ সক্ষম হয় তেন্তে ৰাজ্য প্ৰশাসনক পংগু কৰি তোলাই নহয়, ৰাজ্যখনৰ এপিএছচিৰ বাবে প্ৰস্তুতি চলাই থকা হাজাৰ হাজাৰ শিক্ষিত যুৱক-যুৱতীৰ লগতে সাধৰণ ৰাইজকো হতাশ আৰু স্তম্ভিত কৰি তুলিব।
ডি ৱাই এফ আইয়ে দাবী কৰিছে যে শীঘ্ৰে চৰকাৰে এপিএছচি কেলেংকাৰীত যুক্তসকলক চাকৰিৰ পৰা বৰ্খাস্ত কৰক। প্ৰাক্তন ন্যায়াধীশ বিপ্লৱ কুমাৰ শৰ্মা আয়োগৰ প্ৰতিবেদন ৰাজহুৱা কৰক। মুখ্যমন্ত্ৰী হিমন্ত বিশ্ব শৰ্মাই যদি শীঘ্ৰে এপিএছচি কেলেংকাৰীত যুক্তসকলক বৰ্খাস্ত আৰু ন্যায়িক আয়োগৰ প্ৰতিবেদন ৰাজহুৱা কৰা ব্যৱস্থা গ্ৰহণ নকৰে তেন্তে ডি ৱাই এফ আইয়ে অচিৰেই প্ৰতিবাদী কাৰ্যসূচী গ্ৰহণ কৰিবলৈ বাধ্য হ’ব।
