চলিত সপ্তাহৰ আৰম্ভণিতে হোৱা প্ৰচণ্ড ভূমিকম্পৰ পিছত পুনৰ কঁপি উঠিল বিধ্বংসী আফগানিস্তান। ৰিখটাৰ স্কেলত এই ভূমিকম্পৰ প্ৰাবল্য আছিল ৬.২। সংবাদ সংস্থাৰ সূত্ৰ অনুসৰি ভূমিকম্পৰ কেন্দ্ৰবিন্দু আছিল ভূমিকম্পত বিধ্বস্ত দক্ষিণ-পূব আফগানিস্তানত।
ইছলামবাদ, ৰাৱালপিণ্ডি আৰু পাকিস্তানৰ পঞ্জাৱ আৰু খাইবাৰ পখতুনখোৱা প্ৰদেশতো এই কম্পন অনুভূত হয়। ভাৰতৰ জম্মু-কাশ্মীৰ আৰু দিল্লী এন চি আৰৰ কিছু অংশতো এই কম্পন অনুভূত হয়।
আফগান চৰকাৰৰ এক বিবৃতি অনুসৰি নংগাৰহাৰ আৰু ইয়াৰ আশে-পাশে থকা অঞ্চলত ১৬০ কিলোমিটাৰ গভীৰত আছিল ভূমিকম্পৰ কেন্দ্ৰবিন্দু। ভূকম্পন বিজ্ঞান কেন্দ্ৰসমহৰ পৰা পোৱা তথ্য অনুসৰি আফগানিস্তানৰ হিন্দু কুশ অঞ্চলত ১১১ কিলোমিটাৰ গভীৰত আছিল ভূমিকম্পৰ কেন্দ্ৰবিন্দু।
স্থানীয় সময় অনুসৰি নিশা ১১:৫৬ বজাত অনুভূত হয় কম্পন। যাৰ স্থানাংক আছিল ৩৫.১২° উত্তৰ অক্ষাংশ আৰু ৭০.৭১° পূব দ্ৰাঘিমাংশ। এই ভূমিকম্পৰ ফলত কোনো লোক হতাহতি বা ক্ষয়-ক্ষতিৰ খবৰ পোৱা নাই।
চলিত সপ্তাহৰ আৰম্ভণিতে আফগানিস্তানত হোৱা বৃহৎ ভূমিকম্পৰ ফলত ২২০০ লোকৰ মৃত্যু হোৱাৰ লগতে ৩৬৪০ জন লোক আহত হয়। বহু প্ৰাণ হেৰুৱাৰ লগতে ব্যাপক ক্ষয়ক্ষতিও হৈছিল। ইয়াৰ পিছত তালিবান শাসিত দেশখনত কেইবাটাও আফটাৰশ্বক অনুভূত হয়। পেছাৱৰ, মানচেহৰা, হাংগু, এবটাবাদ, স্বাট, এটক আৰু মালাকান্দতো কম্পন অনুভূত হোৱা বুলি কোৱা হৈছে।
নেচনেল চেণ্টাৰ ফৰ ছিজম’লজী (এন চি এছ)ৰ তথ্য অনুসৰি আজি ৰাতিপুৱাও আফগানিস্তানত ৪.৮ প্ৰাবল্যৰ ভূমিকম্প হয়। বিবৃতি অনুসৰি ১৩৫ কিলোমিটাৰ গভীৰতাত আছিল এই ভূমিকম্পৰ কেন্দ্ৰবিন্দু।
