ড’নাল্ড ট্ৰাম্পৰ প্ৰশাসনে হাৰ্ভাৰ্ড বিশ্ববিদ্যালয়ৰ অনুদান বাতিল কৰাৰ সিদ্ধান্ত লৈছিল। সেই দেশৰ প্ৰশাসনে হাৰ্ভাৰ্ডৰ পুঁজি কৰ্তনৰ সিদ্ধান্ত বাতিল কৰিছে আদালতে। একে সময়তে তাৰ আদালতে ড’নাল্ড ট্ৰাম্পৰ এই সিদ্ধান্তক অবৈধ বুলি ঘোষণা কৰে।
ইহুদী বিদ্বেষৰ অভিযোগ তুলি আমেৰিকা প্ৰশাসনে হাৰ্ভাৰ্ড বিশ্ববিদ্যালয়ৰ ২ বিলিয়ন ডলাৰতকৈ অধিক অনুদান বন্ধ কৰাৰ সিদ্ধান্ত লৈছিল। বুধবাৰে মেছাচুচেটছৰ বষ্টনৰ ফেডাৰেল জজ এলিছন বাৰ’ছে এই সিদ্ধান্ত বাতিল কৰাৰ নিৰ্দেশ দিয়ে।
প্ৰসংগক্ৰমে ইজৰাইলৰ গাজাত আক্ৰমণৰ প্ৰতিবাদত বিশ্ববিদ্যালয় চৌহদত প্ৰতিবাদ সাব্যস্ত কৰা হয়। হাৰ্ভাৰ্ড বিশ্ববিদ্যালয় প্ৰশাসনে ইহুদী আৰু ইজৰাইলী ছাত্ৰ-ছাত্ৰীক সুৰক্ষা প্ৰদান কৰাত ব্যৰ্থ হোৱা বুলি অভিযোগ উত্থাপন কৰে ট্ৰাম্প প্ৰশাসনে। এই দাবীৰ ওপৰত আমেৰিকা প্ৰশাসনে বিশ্ববিদ্যালয়খনক ফেডাৰেল পুঁজি আৰু অনুদান বন্ধ কৰি দিছিল। বিশ্ববিদ্যালয়খনৰ বিৰুদ্ধে কঠোৰ ব্যৱস্থা লোৱাৰো সকীয়াই দিয়ে ট্ৰাম্পে। অৱশ্যে হাৰ্ভাৰ্ডে আমেৰিকা প্ৰশাসনৰ অভিযোগ নাকচ কৰে।
বিশ্ববিদ্যালয় কৰ্তৃপক্ষই দাবী কৰিছে যে হাৰ্ভাৰ্ডৰ নিযুক্তি, নামভৰ্তি আৰু পাঠ্যক্ৰম নিয়ন্ত্ৰণ কৰিবলৈ চৰকাৰে এই অভিযোগ আনিছিল। পুঁজি কৰ্তনৰ বাবে বিশ্ববিদ্যালয়খনে নিযুক্তি প্ৰক্ৰিয়া স্থগিত ৰাখিবলৈ বাধ্য হয়। বিভিন্ন গৱেষণামূলক কাম-কাজতো বাধাৰ সৃষ্টি হৈছিল। ইয়াৰ বাবে জনস্বাস্থ্য আৰু চিকিৎসা গৱেষণা তাত বন্ধ কৰিবলগীয়া হৈছিল।
হাৰ্ভাৰ্ড বিশ্ববিদ্যালয়েও চৰকাৰৰ এই সিদ্ধান্তৰ বিৰুদ্ধে আদালতত গোচৰ তৰিছিল। সেই আবেদনৰ শুনানিৰ সময়ত আদালতে কয় যে হাৰ্ভাৰ্ডৰ পুঁজি স্থগিত ৰখাৰ নিৰ্দেশ আৰু পুঁজি বন্ধ কৰাৰ পত্ৰই আমেৰিকাৰ সংবিধানৰ প্ৰথম সংশোধনী উলংঘা কৰিছে। ইয়াৰ লগে লগে আদালতে বাতিল কৰিছে ট্ৰাম্প প্ৰশাসনৰ নিৰ্দেশ। ইয়াৰ লগতে আদালতে কয় যে আমেৰিকা প্ৰশাসনে ইহুদী বিদ্বেষক কাৰণ হিচাপে লৈ ভৱিষ্যতে হাৰ্ভাৰ্ডৰ ধন কেতিয়াও কৰ্তন কৰিব নোৱাৰিব।
ইয়াৰ পিছত আমেৰিকাৰ আলবানি ল স্কুলৰ অধ্যাপক ৰে ব্ৰেচিয়াই মন্তব্য কৰে যে হাৰ্ভাৰ্ড বিশ্ববিদ্যালয়ে এক বৃহৎ জয় লাভ কৰিছে।
আদালতৰ ৰায়দানৰ পিছত হাৰ্ভাৰ্ড বিশ্ববিদ্যালয়ৰ প্ৰেছিডেন্ট এলান মাইকেল গাৰ্বাৰে কয় যে, “এই ৰায়দানে বিশ্ববিদ্যালয়খনত শৈক্ষিক স্বাধীনতাৰ বাবে আমাৰ যুক্তিৰ বৈধতা প্ৰদান কৰিছে।” আনহাতে, হোৱাইট হাউছৰ মুখপাত্ৰ লিজ হাষ্টনে কয় যে আদালতৰ ৰায়ৰ বিৰুদ্ধে আপীল কৰা হ’ব।
