জালিয়াতিৰ গোচৰত নাম সাঙোৰ খালে দক্ষিণ ভাৰতীয় চিনেমাৰ এগৰাকী আগশাৰীৰ তাৰকাৰ। বলবৎকাৰী সঞ্চালকালয়ে (ইডি) মহেশ বাবুক এক গোচৰৰ সোধা-পোছাৰ বাবে চমন কৰিছে। ২৮ এপ্ৰিলত মহেশ বাবুক মাতি পঠোৱা হৈছে।
বাতৰি অনুসৰি, হায়দৰাবাদৰ দুটা ৰিয়েল এষ্টেট কোম্পানীৰ বিৰুদ্ধে জালিয়াতি আৰু আৰ্থিক কেলেংকাৰীৰ অভিযোগ উত্থাপন হৈছে। ক্ৰেতাৰ পৰা ধন লোৱাৰ পিছতো সময়মতে ফ্লেট ডেলিভাৰী নকৰাৰ অভিযোগ উত্থাপন হৈছে সাই সূৰ্য্য ডেভেলপাৰ্ছ আৰু সুৰানা গ্ৰুপ নামৰ কোম্পানী দুটাৰ বিৰুদ্ধে।
দক্ষিণৰ ছুপাৰষ্টাৰ মহেশ বাবুৱে গৃহ নিৰ্মাণ প্ৰকল্পৰ বিজ্ঞাপনী প্ৰচাৰ চলাইছিল আৰু বিনিময়ত ধন লৈছিল। সাই সূৰ্য্য ডেভেলপাৰ্ছৰ এটা প্ৰজেক্টৰ বাবে মহেশ বাবুৱে ৫.৯ কোটি টকা লৈছিল বুলি বাতৰিৰ সূত্ৰই প্ৰকাশ কৰিছে। ইয়াৰে ৩.৪ কোটি টকা চেক যোগে আৰু ২.৫ কোটি টকা নগদ ধন লৈছিল।
চলিত মাহত এই গোচৰৰ তদন্তত ইডিয়ে ছেকেন্দ্ৰাবাদৰ একাধিক স্থানত ধাৰাবাহিকভাৱে তালাচী চলাইছিল। আৰ্থিক কেলেংকাৰীৰ অভিযোগত এই গোচৰ চলি আছে। ধন লৈও সময়মতে ৰিয়েল এষ্টেট প্ৰকল্পৰ কাম সম্পূৰ্ণ নকৰাৰ অভিযোগ উত্থাপন হৈছে। ছাই সূৰ্য্য ডেভেলপাৰ্ছৰ ‘গ্ৰীণ মিড’ছ’ নামৰ প্ৰকল্পটোক লৈ এই অভিযোগ উত্থাপন হৈছে। সেই প্ৰকল্পৰ ব্ৰেণ্ড এম্বেছাদৰ মহেশ বাবু।
এই সংস্থা দুটাৰ বিৰুদ্ধে আৰু কি অভিযোগ আছে? তেওঁলোকে অনুমতি অবিহনেই বহু মাটিৰ প্লট বিক্ৰী কৰি কোটি কোটি টকা সংগ্ৰহ কৰিছে। পঞ্জীয়ন কৰি দিয়াৰ মিছা প্ৰতিশ্ৰুতি দিছে। এই প্ৰৱঞ্চনাত মহেশ বাবু পোনপটীয়াকৈ জড়িত নহয়। কিন্তু তেওঁ কেনেকৈ ইয়াৰ পাৰিশ্ৰমিক লাভ কৰিলে তাৰ তদন্ত অব্যাহত ৰাখিছে ইডিয়ে।
