অহা বৰ্ষত অনুষ্ঠিত হ’ব দেশৰ লোকসভা নিৰ্বাচন। নিৰ্বাচনী প্ৰক্ৰিয়াত ভোটাৰৰ অধিক অংশগ্ৰহণক উৎসাহিত কৰাৰ উদ্দেশ্যে ক্ৰিকেট জগতৰ কিংবদন্তি তাৰকা শচীন টেণ্ডুলকাৰক নিৰ্বাচন আয়োগৰ ‘ৰাষ্ট্ৰীয় আইকন’ হিচাপে নিযুক্তি দিয়া হৈছে।
কাইলৈ টেণ্ডুলকাৰ আৰু আয়োগৰ মাজত এই সন্দৰ্ভত বুজাবুজিৰ চুক্তি স্বাক্ষৰিত হ’ব। তিনি বছৰীয়া চুক্তিৰ অংশ হিচাপে শচীন টেণ্ডুলকাৰে ভোটাৰ সজাগতাৰ বাবে কাম কৰিব।
নিৰ্বাচন আয়োগে এক বিবৃতিত কয় যে যুৱ প্ৰজন্মৰ মাজত টেণ্ডুলকাৰৰ প্ৰভাৱে আগন্তুক নিৰ্বাচনত ভোটাৰৰ অংশগ্ৰহণ বৃদ্ধিৰ ক্ষেত্ৰত এক উল্লেখযোগ্য পদক্ষেপ হিচাপে চিহ্নিত কৰিব।
প্ৰাক্তন ক্ৰিকেট তাৰকাগৰাকীৰ নিযুক্তিৰ জৰিয়তে নিৰ্বাচন আয়োগে নগৰীয়া অঞ্চল আৰু যুৱক-যুৱতীসকলৰ ভোটদানৰ প্ৰতি উদাসীনতাৰ প্ৰত্যাহ্বানসমূহ মোকাবিলা কৰিব বিচাৰে।
নিৰ্বাচন আয়োগে নিৰ্বাচনী প্ৰক্ৰিয়াত অংশগ্ৰহণৰ বাবে ভোটাৰক প্ৰেৰণা যোগাবলৈ বিভিন্ন ক্ষেত্ৰৰ প্ৰখ্যাত ভাৰতীয়সকলক ৰাষ্ট্ৰীয় আইকন হিচাপে নিযুক্তি দি আহিছে।
যোৱা বছৰ আয়োগে অভিনেতা পংকজ ত্ৰিপাঠীক ৰাষ্ট্ৰীয় আইকন হিচাপে স্বীকৃতি দিছিল। ইয়াৰ পূৰ্বে ২০১৯ চনৰ লোকসভা নিৰ্বাচনৰ সময়ত এম এছ ধোনী, আমিৰ খান, মেৰী কমৰ দৰে তাৰকাক ৰাষ্ট্ৰীয় আইকন হিচাপে নিযুক্তি দিয়া হৈছিল।
