এপিনে কৰ’নাৰ সংহাৰ আৰু আনপিনে চীন সীমান্তত যুদ্ধমুখৰ পৰিৱেশৰ মাজতে আজি বিভিন্ন ৰাজ্যৰ মুঠ ২০খন ৰাজ্যসভাৰ আসনৰ বাবে ভোটগ্ৰহণ অনুষ্ঠিত হ’ব।
আজি ভোটগ্ৰহণ হ’বলগীয়া আসনকেইখনৰ ভিতৰত আছে অন্ধ্ৰ প্ৰদেশৰ ৪খন, গুজৰাটৰ ৪খন, ৰাজস্থানৰ ৩খন, ঝাড়খণ্ডৰ ২খন, মধ্যপ্ৰদেশৰ ৩খন, মণিপুৰৰ ১খন,মেঘালয়ৰ ১খন, অৰুণাচল প্ৰদেশৰ ১খন আৰু মিজোৰামৰ ১খন আসন।
গুজৰাট, ৰাজস্থান আৰু মধ্যপ্ৰদেশৰ আসনকেইখনত তীব্ৰ প্ৰতিদ্বন্দ্বিতা হোৱাৰ সম্ভাৱনা আছে যদিও এইসময়ত সকলোৰে দৃষ্টি নিৱদ্ধ হৈছে মণিপুৰৰ আসনখনৰ ওপৰতহে।
ৰাজ্যসভাৰ এই নিৰ্বাচনৰ পূৰ্বেই মণিপুৰত তিনিগৰাকী বিজেপি বিধায়কে পদত্যাগ কৰি কংগ্ৰেছত যোগদান কৰিছে।
বিজেপি চৰকাৰখনৰ পৰা সমৰ্থন প্ৰত্যাহাৰ কৰি তিনিগৰাকী মন্ত্ৰীকে ধৰি আন ছয়জন বিধায়কেও বিৰোধী শিৱিৰত অৱস্থান গ্ৰহণ কৰিছে।
স্বাভাৱিকতে মণিপুৰৰ ৰাজ্যসভাৰ এই আসনখনৰ ওপৰত ৰাজনৈতিক পৰ্যবেক্ষকৰ দৃষ্টি ৰৈছে।
মণিপুৰৰ ৰাজ্যসভাৰ আসনখনৰ বাবে বিজেপিয়ে লেইছেম্বা ছানাজওবাক আৰু কংগ্ৰেছে টী মাংগি বাবুক প্ৰাৰ্থিত্ব দিছে।
গুজৰাটত চাৰিখন আসনৰ ভিতৰত বিজেপিয়ে ৩খন আৰু কংগ্ৰেছে ২খন আসনত প্ৰাৰ্থী আগবঢ়াইছে।
তাৎপৰ্যপূৰ্ণ কথাটো হ’ল দলীয় ভোটেৰে নিজৰ প্ৰাৰ্থক বিজয়ী কৰিব পৰাকৈ বিজেপি বা কংগ্ৰেছ কাৰো হাততে প্ৰয়োজনীয় সংখ্যা নাই।
মধ্যপ্ৰদেশত যোৱা মাৰ্চ মাহত জ্যোতিৰাদিত্য সিন্ধিয়াৰ নেতৃত্ব কেইবাগৰাকীও কংগ্ৰেছী বিধায়কে কমল নাথ চৰকাৰক সংকটত পেলাই বিজেপিত যোগদান কৰিছিল। বৰ্তমান বিজেপ শাসিত মধ্যপ্ৰদেশৰ ৩খন আসনৰ ভিতৰত কংগ্ৰেছ আৰু বিজেপি দুয়োটা দলেই দুজনকৈ প্ৰাৰ্থী নিক্ষেপ কৰিছে।
সেইদৰে ৰাজস্থানতে ৩খন আসনৰ বাবে বিজেপি তথা কংগ্ৰেছ দলে দুজনকৈ প্ৰাৰ্থী প্ৰক্ষেপ কৰিছে।
যোৱা ফেব্ৰুৱাৰিত ১৭খন ৰাজ্যৰ মুঠ ৫৫খন আসনৰ বাবে নিৰ্বাচন আয়োগে ভোটগ্ৰহণৰ কথা ঘোষণা কৰাৰ পাছত মাৰ্চত আয়োগে ৩৭গৰাকী প্ৰাৰ্থী বিনা প্ৰতিদ্বন্দ্বিতাৰে নিৰ্বাচিত হোৱাৰ কথা ঘোষণা কৰিছিল।
বাকী ৰোৱা ১৮খন আসনৰ বাবে নিৰ্বাচন অনুষ্ঠিত কৰাৰ কথা ঘোষণা কৰাৰ পাছত অৰুণাচল প্ৰদেশ আৰু মিজোৰামৰ এখনকৈ ৰাজ্যসভাৰ আসনৰ বাবেও নিৰ্বাচন অনুষ্ঠিত কৰাৰ কথা ঘোষণা কৰা হৈছিল।
