ৰাজ্যখনৰ দুটাকৈ পৃথক স্থানত সংঘটিত ঘটনাত বিদ্যুৎস্পৃষ্ট হৈ দুজন লোকে কৰুণ মৃত্যুক সাবটি লয়।
ইয়াৰে প্ৰথমটো ঘটনা শিৱসাগৰ জিলাৰ চামগুৰিত আজি পুৱা সংঘটিত হয়।
ঘটনাৰ বিৱৰণী মতে চামগুৰিৰ দেৱকান্ত দাস আৰু জান দাসৰ এক মাত্ৰ কন্যা ৭ বছৰীয়া অসীমা দাসে আজি পুৱা পঢ়াৰ টেবুলত বহি পঢ়িবলৈ লৈ টেবুল ফেনৰ চুইচ অন কৰোঁতে আকস্মিক ভাবে বিদ্যুৎ প্ৰবাহিত হৈ মৃত্যুৰ মুখত পৰে।
অসীমা দাস চামগুৰি শংকৰদেৱ জ্যোতি বিদ্যাপীঠৰ প্ৰথম শ্ৰেণীৰ ছাত্ৰী আছিল।
আনহাতে আনটো ঘটনা সংঘটিত হয় দৰঙৰ ছিপাঝাৰত। এজল লোকৰ বাসগৃহত সংযোগ কৰা বিদ্যুত্ পৰিবাহী তাঁৰত লাগি মৃত্যু ঘটে ৭২ বছৰীয়া চমন ডেকা নামৰ লোকজনৰ।
উল্লেখ্য যে শক্তি বিভাগে বিদ্যুৎ সংযোগ বিচ্ছিন্ন কৰি থোৱা তাঁৰ বিপজ্জনকভাৱে ওলমি থকাৰ ফলতে এই ঘটনা সংঘটিত হ’বলৈ পালে বুলি স্থানীয় ৰাইজে জানিবলৈ দিয়ে।
