অসম অভিমুখী কামাখ্যা এক্সপ্ৰেছ লাইনচ্যুত হৈছে। ওড়িশাত সংঘটিত হৈছে আন এক ৰে’ল দুৰ্ঘটনা। দেওবাৰে এছ এম ভি টি বেংগালুৰু কামাখ্যা এক্সপ্ৰেছৰ একাধিক ডবা লাইনচ্যুত হৈছে। বেংগালুৰুৰ পৰা কামাখ্যালৈ আহি থকা ৰে’লখনে ওড়িশাৰ কটক ষ্টেচনৰ পৰা ওলাই অহাৰ পাছত মংগুলিৰ সমীপত এই দুৰ্ঘটনাত পতিত হয়।
এতিয়ালৈকে কমেও ১১ ডবা লাইনচ্যুত হোৱাৰ খবৰ পোৱা গৈছে। অৱশ্যে হতাহতৰ কোনো নিশ্চিত খবৰ পোৱা হোৱা নাই। ঘটনাৰ খবৰ পাই ৰে’লৱেৰ জ্যেষ্ঠ বিষয়াসকল ঘটনাস্থলীত উপস্থিত হয়।
বৰ্তমান এই পথত ৰে’ল সেৱা ব্যাহত হোৱাৰ খবৰ পোৱা গৈছে। ভাল খবৰটো হ’ল যে ৰে’লখন লাহে লাহে চলি থকাৰ বাবেই এটা ডাঙৰ দুৰ্ঘটনাৰ পৰা ৰক্ষা পৰিল।
কটকৰ পৰা ৮ কিলোমিটাৰ নিলগৰ চৌধৱাৰৰ মংগুলী ষ্টপিঙৰ সমীপত প্ৰচণ্ড জোকাৰণিৰ সৈতে হঠাৎ ৰৈ যায় ৰে’লখন। কেইবাটাও ডবা হালি হৈ পৰে। ৰে’ল খনৰ যাত্ৰীসকলে আতংকিত হৈ চিঞৰিবলৈ ধৰে। দুৰ্জা খুলি ৰে’লপথত জপিয়াই পৰে। অলপ পিছতে লাইনচ্যুত হয় কেইবাটাও ডবা।
জানিব পৰা মতে ৰে’লপথৰ পৰা ওলাই যোৱা বগীবোৰৰ ভিতৰত আছিল তিনিটা সাধাৰণ ডবা। ইফালে দুৰ্ঘটনাৰ পিছতে কেইবাখনো এক্সপ্ৰেছ আৰু যাত্ৰীবাহী ৰে’ল বন্ধ কৰি দিয়া হৈছে। আহমেদাবাদ-কটক এক্সপ্ৰেছ আৰু আহমেদাবাদ-পুৰী এক্সপ্ৰেছকে ধৰি কেইবাখনো দীৰ্ঘ দূৰত্বৰ ৰে’ল ৰখাই থোৱা হৈছে।
উল্লেখ্য যে ৰে’লখনত অসমৰো বহু যাত্ৰী থকা বুলি জানিব পৰা গৈছে।
