বিশ্বৰ প্ৰথমগৰাকী বেগী বলাৰ হিচাপে ৬০০ টেষ্ট উইকেট দখল কৰাৰ অনন্য অভিলেখৰ অধিকাৰী হ’ল জেমছ এণ্ডাৰছন।
ইংলেণ্ড আৰু পাকিস্তানৰ মাজত চলি থকা শৃংখলাৰ তৃতীয়খন টেষ্টত পাকিস্তানৰ অধিনায়ক আজাহাৰ আলীৰ উইকেট দখল কৰি এণ্ডাৰছনে ৬০০ উইকেট দখল কৰাৰ মাইলষ্টোনত উপনীত হয়।
জেমছ এণ্ডাৰছন ৬০০ টেষ্ট উইকেট দখল কৰা প্ৰথমগাৰকী বেগী বলাৰ হোৱাৰ বিপৰীতে ৬০০ টেষ্ট উইকেটৰ অধিকাৰী হোৱা বিশ্বৰ চতুৰ্থ গৰাকী বলাৰ।
জেমছ এণ্ডাৰছনৰ উপৰিও শ্ৰীলংকাৰ অফস্পীনাৰ মুথিয়া মুৰুলিধৰণ, অষ্ট্ৰেলিয়াৰ লেগ স্পীনাৰ শ্বেণ ৱাৰ্ণ আৰু ভাৰতৰ লেগ স্পীনাৰ অনিল কুম্বলে ৬০০ৰ অধিক টেষ্ট উইকেট দখল কৰাৰ কৃতিত্ব গঢ়িছিল।
জেমছ এণ্ডাৰছনে টেষ্টত ৬০০ উইকেট দখল কৰাৰ পাছতে বিশ্বৰ বিভিন্ন ক্ৰিকেটাৰে এণ্ডাৰছনক শুভেচ্ছা জ্ঞাপন কৰিছে।
”মই মোৰ জীৱনত কোনো বেগী বলাৰে টেষ্টত ৬০০ টা উইকেট দখল কৰা দেখা পাম বুলি ভবা নাছিলো। এয়া মাথো সংখ্যা নহয় এয়া বিশ্বৰ বিভিন্ন প্ৰান্তত তেওঁৰ বলিঙৰ গুণগত মানদণ্ড- উইকেট ফাষ্ট, শ্লো, বাউঞ্চ, চীম যিধৰণৰ পৰিবেশে নহওঁক সেয়া তেওঁৰ বলিঙৰ ওপৰত নিৰ্ভৰ নকৰে। জিমি ছাৰ আপুনি শ্ৰেষ্ঠ,” ভাৰতীয় ক্ৰিকেট দলৰ প্ৰাক্তন তাৰকা খেলুৱৈ যুৱৰাজ সিঙে ছ’চিয়েল মিডিয়াত এণ্ডাৰছনক শুভেচ্ছা জ্ঞাপন কৰি এইদৰে লিখে।
