আজি দেওপাহাৰ প্ৰস্তাৱিত সংৰক্ষিত বনাঞ্চলৰ সমীপতে থকা কালিয়নী বনাঞ্চলত অৱস্থিত অসম আৰক্ষীৰ ফায়াৰিং ৰেঞ্জ স্থানান্তৰৰ দাবীৰে গোলাঘাট জিলাৰ আয়ুক্ত পুলক মহন্তৰ জৰিয়তে অসমৰ মুখ্যমন্ত্ৰীলৈ এখন স্মাৰক পত্ৰ প্ৰেৰণ কৰিছে গোলাঘাটৰ পৰিৱেশকৰ্মী অপূৰ্ব বল্লভ গোস্বামীয়ে।
গোস্বামীয়ে কালিয়নী বনাঞ্চলত বন্যহস্তীৰ অৱস্থিতিৰ প্ৰতি লক্ষ্য ৰাখিয়েই ফায়াৰিং ৰেঞ্জটো সেই স্থানৰ পৰা অন্য স্থানলৈ তৎকালীনভাৱে স্থানান্তৰৰ পোষকতা কৰিছে। কিয়নো বিগত বৰ্ষত বিভাগীয় হস্তী গণনাত এই কালিয়নী বনাঞ্চলত বহু সংখ্যক বন্যহস্তীৰ অৱস্থিতি পোৱা গৈছিল৷ সেয়েহে বন্যহস্তীৰ বিচৰণত যাতে ফায়াৰ ৰেঞ্জটো বাধা কাৰণ হব নোৱাৰে তাৰ প্ৰতি লক্ষ্য ৰাখি পৰিৱেশকৰ্মীগৰাকীয়ে এই পদক্ষেপ গ্ৰহণ কৰিছে।
ইফালে গোলাঘাট জিলাত হাতী-মানুহৰ সংঘাতৰ বাবে এই বনাঞ্চলখন সংৰক্ষণ কৰাত অতিকে প্ৰয়োজন বুলিও দাবী কৰে গোস্বামীয়ে৷
অন্য হাতে ২০২৪ বৰ্ষৰ ১৩ ছেপ্তেম্বৰত কালিয়নী বনাঞ্চলখন প্ৰস্তাৱিত সংৰক্ষিত বনাঞ্চল ঘোষণা কৰা দাবীত আন এক স্মাৰক পত্ৰ প্ৰেৰণ কৰাৰ সম্পৰ্কত আজি অৱগত কৰে গোস্বামীয়ে। সেই সময়ৰ গোলাঘাটৰ জিলা আয়ুক্ত পি উদয় প্ৰবীণৰ জৰিয়তে বনাঞ্চলখন প্ৰস্তাৱিত সংৰক্ষিত বনাঞ্চল ঘোষণাৰ দাবীত ৰাজ্যৰ মুখ্যমন্ত্ৰীলৈ স্মাৰক পত্ৰ প্ৰেৰণ কৰিছিল গোস্বামীয়ে।
