মই মোৰ স্থিতিত অটল, বিধেয়কৰ বিৰোধিতা কৰি যাম : জুবিন
নাগৰিকত্ব বিধেয়কৰ সপক্ষে গ্ৰহণ কৰা বিজেপিৰ স্থিতিক তীব্ৰ সমালোচনা কৰা আৰু বিধেয়কক লৈ বিজেপিৰে মিত্ৰতা ত্যাগ কৰা অসম গণ পৰিষদক সমৰ্থন আগবঢ়োৱা অসমৰ জনপ্ৰিয় শিল্পী জুবিন গাৰ্গে সংবাদ মাধ্যমৰ আগত প্ৰথমবাৰৰ বাবে দুয়ো দলৰ মাজত পুনৰ গঢ়ি উঠা মিত্ৰতা সন্দৰ্ভত মত প্ৰকাশ কৰিছে।
নাগৰিকত্ব বিধেয়কক লৈ অসমত চলা প্ৰবল আন্দোলনক নিঃস্বাৰ্থ ভাৱে সমৰ্থন আগবঢ়োৱা শিল্পীগৰাকীক সাংবাদিকে অগপ-বিজেপিৰ মিত্ৰতা সন্দৰ্ভত প্ৰশ্ন কৰাত কয়, ‘ৰাজনৈতিক দলবোৰে ক্ষমতাৰ বাবে যিকোনো কাম কৰিব পাৰে। এই ক্ষেত্ৰত মই মাত নামাতো। মই মোৰ মতে আগবাঢ়ি যাম’।
ইয়াৰ উপৰি নাগৰিকত্ব সংশোধনী বিধেয়ক সন্দৰ্ভত তেওঁ আৰু কয় যে মই মোৰ স্থিতিত অটল আছো। জাতীয় দল-সংগঠনৰ সৈতে লগ লাগি অনাগত দিনত বিধেয়কখনৰ বিৰোধিতা কৰি যাম।
উল্লেখ্য যে বৃহস্পতিবাৰে জনপ্ৰিয় গায়ক জুবিনে কামৰূপ-দৰং সীমান্তৱৰ্তী ডুমনীচকীৰ বৰনদী পাৰত কিছু সতীৰ্থৰ সৈতে তেওঁৰ আহিব লগীয়া নতুন ছবি ‘কাঞ্চনজংঘা’ৰ এটি গীতৰ দৃশ্যগ্ৰহণৰ বাবে গৈছিল। আৰু দৃশ্যগ্ৰহণৰ সময়তে জুবিন গাৰ্গৰ পৰা সাংবাদিকসকলে সাম্প্ৰতিক ৰাজনৈতিক প্ৰেক্ষাপট সম্পৰ্কে মতামত জানিব বিচৰাত উক্ত মন্তব্য কৰে।
ইয়াৰ উপৰি জুবিনে সাংবাদিকৰ আগত নিজৰ ছবিখনৰ বিষয়েও কিছু কথা জানিবলৈ দিয়ে। তেওঁ কয় যে কাঞ্চনজংঘা ছবিখনৰ শ্বুটিং এতিয়া অন্তিম পৰ্যায়ত আৰু শীঘ্ৰে ছবিখনৰ যাৱতীয় কাম সম্পন্ন কৰি ছবিগৃহত মুক্তিৰ ব্যৱস্থা কৰিব।