ম্যানমাৰৰ এখন কোৰ্টে শুকুৰবাৰে দেশখনৰ টানিনথায়ৰী প্ৰদেশৰ এগৰাকী প্ৰাক্তন মুখ্য মন্ত্ৰীক দুৰ্নীতিৰ অভিযোগত ৩০ বছৰ কাৰাদণ্ড বিহে।
প্ৰাক্তন মুখ্য মন্ত্ৰী গৰাকীক এবছৰ পূৰ্বে গ্ৰেপ্তাৰ কৰা হৈছিল।
ম্যানমাৰৰ দুৰ্নীতি বিৰোধী বিভাগে উল্লেখ কৰা অনুসৰি দোষী সাব্যস্ত হোৱা লি লি মাৱে তেওঁৰ বাসগৃহটো গ্লোৱেল গ্ৰ্যাণ্ড চাৰ্ভিছ কোম্পানীক ২০০এম ক্য়ায়াটত বিক্ৰী কৰি দিছিল।
দুৰ্নীতি বিভাগৰ অভিযোগ অনুসৰি বাসগৃহটো বিক্ৰী কৰা টকাৰ পৰিমাণ নিৰ্ধাৰিত বজাৰ মূল্যতকৈ বহু গুণে বেছি আছিল।
প্ৰাক্তন মুখ্য মন্ত্ৰী গৰাকীয়ে তেওঁৰ ফাৰ্মখনো বহুতো ৰাজহুৱা ঠিকাদাৰক টকাৰ বিনিময়ত ব্যৱহাৰৰ বাবে লিজত দিছিল বুলি জানিব পৰা গৈছে।
ম্যানমাৰৰ টানিনথায়ৰী প্ৰদেশৰ প্ৰাক্তন মুখ্য মন্ত্ৰী গৰাকী ইয়াৰ লগতে আৰু আন একাধিক অভিযোগত অভিযুক্ত হৈ আছিল।
মুখ্য মন্ত্ৰী হিচাপে কাৰ্য্য নিৰ্বাহ কৰা ৰাজনৈতিক নেত্ৰী গৰাকীয়ে এতিয়া জীৱনৰ ৩০ বছৰ কাৰাগাৰত অতিবাহিত কৰিবলগীয়া হোৱা খবৰে দেশখনত ব্যাপক চৰ্চা লাভ কৰিছে।
