এক চাঞ্চল্যকৰ হত্যাকাণ্ডই জোকাৰিছে হাৰিয়ানা। ৰাজ্যখনৰ গুৰুগ্ৰাম চহৰৰ এখন হোটেলত হত্যাৰ বলি হৈছে এগৰাকী মডেল। হত্যাকাণ্ড সংঘটিত হোৱা চিটি পইণ্ট হোটেলৰ স্বত্বাধিকাৰী অভিজিত সিং নামৰ এজন ব্যক্তিৰ বিৰুদ্ধে উত্থাপন হৈছে হত্যাৰ অভিযোগ।
নিহত মডেলগৰাকীক দিব্যা পাহুজা বুলি চিনাক্ত কৰা হৈছে। এই গোচৰত গুৰুগ্ৰাম ক্ৰাইম ব্ৰাঞ্চে প্ৰধান অভিযুক্ত অভিজিতকে ধৰি তিনিজন লোকক গ্ৰেপ্তাৰ কৰিছে। প্ৰকাশ আৰু ইন্দ্ৰজ নামৰ ধৃত অভিযুক্ত দুজনে পূৰ্বে প্ৰধান অভিযুক্ত অভিজিতৰ হোটেলতে কাম কৰিছিল বুলি জানিব পৰা গৈছে।
অভিযোগ অনুসৰি, হোটেলৰ স্বত্বাধিকাৰী অভিজিতে প্ৰকাশ আৰু ইন্দ্ৰজৰ সৈতে হত্যাকাণ্ড সংঘটিত কৰে আৰু তাৰ পিছত দুয়োকে ১০ লাখ টকা দি দিব্যাৰ মৃতদেহ হোটেলৰ পৰা উলিয়াই নিয়ে। হোটেলৰ চিচিটিভি কেমেৰাত বন্দী হয় এই সমগ্ৰ দৃশ্য
হোটেলৰ চিচিটিভি কেমেৰাৰ আধাৰত আৰক্ষীয়ে প্ৰকাশ কৰা মতে, হোটেলখনৰ স্বত্বাধিকাৰী অভিজিত আৰু আন এজন অভিযুক্তৰ সৈতে যোৱা ২ জানুৱাৰীত পুৱা প্ৰায় ৪ বজাত হোটেলৰ ৰিচেপচনত উপস্থিত হৈছিল দিব্যা আৰু এটা কোঠালৈ সোমাই গৈছিল।
কিন্তু ৰাতি প্ৰায় ১০:৪৫ বজাত অভিজিতে আন দুজন অভিযুক্তৰ সৈতে চাদৰেৰে মেৰিয়াই থোৱা দিব্যাৰ মৃতদেহ হোটেলৰ পৰা টানি নি নীলা ৰঙৰ এখন বিএমডব্লিউ গাড়ীত উঠোৱা কেমেৰাত ধৰা পৰে। চিচিটিভি ফুটেজৰ ভিত্তিত গুৰুগ্ৰাম আৰক্ষীয়ে হত্যাকাণ্ডৰ তদন্ত অব্যাহত ৰাখিছে।
লগতে ক্ৰাইম ব্ৰাঞ্চৰ কেইবাটাও দলে পঞ্জাৱ আৰু অন্যান্য অঞ্চলত মৃতদেহটোৰ সন্ধানত অভিযান অব্যাহত ৰাখিছে। ইফালে দিব্যাৰ পৰিয়ালে দাখিল কৰা এজাহাৰৰ ভিত্তিত অভিজিত আৰু আন অভিযুক্তৰ বিৰুদ্ধে গোচৰ ৰুজু কৰা হয়।
উল্লেখ্য যে ২০১৬ চনৰ গেংষ্টাৰ সন্দীপ গাডোলিৰ ‘ভুৱা’ এনকাউণ্টাৰ গোচৰৰ প্ৰধান অভিযুক্ত আছিল দিব্যা পাহুজা। গাডোলীৰ ভগ্নী সুদেশ কটাৰিয়া আৰু ভাতৃ ব্ৰহ্ম প্ৰকাশে অভিজিতৰ সৈতে গোপন বুজাবুজি কৰি দিব্যাৰ হত্যাকাণ্ড সংঘটিত কৰা বুলি পৰিয়ালে অভিযোগ কৰিছে।
২০১৬ চনত মুম্বাইত এক বিতৰ্কিত এনকাউণ্টাৰত নিহত হৈছিল গেংষ্টাৰ সন্দীপ গাডোলি। গাডোলিৰ প্ৰেমিকা দিব্যাৰ বিৰুদ্ধে সেই সময়ত আৰক্ষীৰ তথ্যদাতা বুলি অভিযোগ উত্থাপন হৈছিল। এই হত্যাৰ অভিযোগত দিব্যা, দিব্যাৰ মাতৃ আৰু পাঁচজন আৰক্ষী জোৱানৰ বিৰুদ্ধে গোচৰ ৰুজু হৈছিল।
দিব্যাক সন্দীপ গাডোলীৰ হত্যাকাণ্ডৰ প্ৰধান অভিযুক্ত হিচাপে প্ৰক্ষেপ কৰা হৈছিল আৰু গ্ৰেপ্তাৰৰ পিছতে এই গোচৰত প্ৰায় সাত বছৰ কাৰাবন্দী হৈ আছিল দিব্যা। যোৱা বছৰৰ জুন মাহত বোম্বাই উচ্চ ন্যায়ালয়ে তেওঁক জামিন প্ৰদান কৰিছিল।
