শুকুৰবাৰে পুৱাই গুৱাহাটী বাসগৃহৰ পৰা মেঘালয়ৰ বিজ্ঞান আৰু প্ৰযুক্তিবিদ্যা বিশ্ববিদ্যালয়ৰ প্ৰতিষ্ঠাপক মহবুবুল হকক গ্ৰেপ্তাৰ কৰাৰ পিছতে অসমৰ মুখ্যমন্ত্ৰী হিমন্ত বিশ্ব শৰ্মাই ব্যক্তিগত প্ৰতিশোধ পূৰণ কৰাৰ অভিযোগ উত্থাপন কৰিছে।
অসম আৰক্ষীৰ বিষয়াসকলে জনোৱা মতে, পথাৰকান্দিৰ চেণ্ট্ৰেল পাব্লিক স্কুলত চিবিএছই পৰীক্ষাৰ সময়ত সংঘটিত অপ্ৰীতিকৰ পৰিস্থিতিৰ অভিযোগত শ্ৰীভূমি জিলাত পঞ্জীয়ন হোৱা গোচৰৰ বাবে মহবুবুল হকক গ্ৰেপ্তাৰ কৰা হৈছে।
উল্লেখ্য যে পথাৰকান্দিৰ চেণ্ট্ৰেল পাব্লিক স্কুল এডুকেচন এণ্ড ৰিচাৰ্চ ডেভেলপমেণ্ট (ই আৰ ডি) ফাউণ্ডেচনে পৰিচালনা কৰে। এই সংস্থাটো প্ৰতিষ্ঠা কৰিছিল মহবুবুল হকে।
গ্ৰেপ্তাৰৰ পিছত হকে সাংবাদিকৰ আগত কয় যে ছাত্ৰ-ছাত্ৰীক নকল কৰিবলৈ নিদিয়াৰ বাবে তেওঁক আৰক্ষীয়ে চমন দিছিল। লগতে কয়, তেওঁ এতিয়ালৈকে এজাহাৰ পোৱা নাই আৰু এই বিষয়ে একো নাজানে।
তেওঁ কয় যে আৰক্ষীয়ে চিবিএছইৰ দ্বাদশ শ্ৰেণীৰ পদাৰ্থ বিজ্ঞান পৰীক্ষাৰ সময়ত বিদ্যালয়খনত আইন আৰু শৃংখলা বিঘ্নিত হোৱা বুলি জানিবলৈ দিছিল।
কিন্তু এডুকেচন এণ্ড ৰিচাৰ্চ ডেভেলপমেণ্টৰ প্ৰধান সম্পাদক মেহজাবিন ৰহমানে এই অভিযোগ অস্বীকাৰ কৰি কয় যে মূলতঃ পৰীক্ষাত ছাত্ৰ-ছাত্ৰীক নকল কৰাৰ সুযোগ নিদিয়াৰহে অভিযোগ উত্থাপন হৈছিল।
ইফালে সচেতন মহলৰ মতে, বিদ্যালয়খনৰ অধ্যক্ষ, কৰ্মচাৰী আৰু ই আৰ ডি ফাউণ্ডেশ্যনৰ বিষয়াসকলক সোধা-পোছা কৰাৰ পৰিৱৰ্তে আৰক্ষীয়ে বিদ্যালয়খনত সংঘটিত হোৱা এই কাণ্ডৰ বাবে মহবুবুল হক গ্ৰেপ্তাৰ কৰা কাণ্ডই মুখ্যমন্ত্ৰীৰ ব্যক্তিগত আক্ৰোশৰ ফালে ইংগিত কৰে।
আন একাংশ লোকৰ মতে, মবুবুল হকে পিএ চাংমা আন্তঃৰাষ্ট্ৰীয় চিকিৎসা মহাবিদ্যালয় স্থাপন কৰাৰ পিছৰে পৰা ইউএছটিএম মুখ্যমন্ত্ৰীৰ আক্ৰমণৰ লক্ষ্য হৈ পৰিছে।
সূত্ৰই প্ৰকাশ কৰিছে যে মুখ্যমন্ত্ৰী শৰ্মাই হকক লক্ষ্য কৰি লৈছে কাৰণ চৰকাৰৰ দুৰ্ব্যৱহাৰৰ সন্মুখীন হোৱা অসমৰ বহু চিকিৎসকে পিআইএমচিত যোগদান কৰাৰ পৰিকল্পনা কৰিছে।
এটা সূত্ৰই দাবী কৰে যে, “এইটো এটা মূল কাৰণ যে শৰ্মাই বাৰে বাৰে ইউ এছ টি এমৰ প্ৰতিষ্ঠাপকক লক্ষ্য কৰি লৈছে।”
উল্লেখ্য যে শেহতীয়াকৈ মুখ্যমন্ত্ৰী হিমন্ত বিশ্ব শৰ্মাই মহবুবুল হক আৰু ইউ এছ টি এমৰ বিৰুদ্ধে ধাৰাবাহিকভাৱে আক্ৰমণ চলাই আহিছে। মাত্ৰ কিছুদিন পূৰ্বে মুখ্যমন্ত্ৰীয়ে বিশ্ববিদ্যালয়খনয়ে ভুৱা ডিগ্ৰী প্ৰদান কৰাৰ অভিযোগ উত্থাপন কৰিছিল, যিটো ইউ এছ টি এম কৰ্তৃপক্ষ আৰু মেঘালয়ৰ মুখ্য সচিব ডি পি ৱাহলাঙে খণ্ডন কৰিছিল।
