নগাঁও জিলাৰ আৰক্ষী অধীক্ষক শংকৰব্ৰত ৰায় মেধিলৈ কেন্দ্ৰীয় গৃহ মন্ত্ৰণালয়ে ২০১৯ বৰ্ষৰ অনুসন্ধান পাৰদৰ্শিতা বঁটা আগবঢ়াইছে। শংকৰব্ৰত ৰায় মেধিৰ লগতে অসমৰ আৰু দুগৰাকী আৰক্ষী বিষয়াই এই বঁটা লাভ কৰিবলৈ সক্ষম হৈছে।
বটদ্ৰৱাৰ ধৰ্ষণকাণ্ডৰ তদন্তৰ বাবে গঠন কৰা বিশেষ অনুসন্ধানকাৰী গোটৰ মুৰব্বী শংকৰব্ৰত ৰায় মেধিয়ে গোচৰটোত লাভ কৰা সফলতাৰ বাবেই লাভ কৰিছে এই বঁটা।
উল্লেখ্য যে ২০১৮ বৰ্ষৰ মাৰ্চ মাহত বটদ্ৰৱাৰ লালুংগাঁৱত তিনিজন দুৰ্বৃত্তই মিলি এগৰাকী নাবালিকাক ধৰ্ষণ কৰি জ্বলাই দিছিল।
পিচত আৰক্ষীৰ তদন্তৰ ওপৰত ভিত্তি কৰি মহামান্য ন্যায়ালয়ে ফাষ্ট ট্ৰেক আদালতত গোচৰটোৰ বিচাৰ কৰি বিগত বৰ্ষৰে ছেপ্টেম্বৰ মাহত ঘটনাটোৰ মূল অভিযুক্তজনক মৃত্যুদণ্ডৰে দণ্ডিত কৰিছিল।
আৰক্ষী অধীক্ষক শংকৰ ব্ৰত ৰায় মেধিৰ নেতৃত্বত অতি কম দিনৰ ভিতৰত গোচৰটোৰ অভিযোগনামা দাখিল কৰিবলৈ সক্ষম হৈছিল আদালতত।
ক্ষীপ্ৰ আৰু সঠিক তদন্তৰ বাবে ৰায়মেধিলৈ এই বিশেষ স্বীকৃতি আগবঢ়োৱা হৈছে। ৰায় মেধিৰ লগতে দেশৰ মুঠ ৯৬গৰাকী আৰক্ষী বিষয়াক এই বঁটা প্ৰদান কৰা হ’ব।
