সাংসদ প্ৰদ্যুত বৰদলৈ আৰু বিধায়িকা শিৱামণি বৰাৰ বাহনৰ ওপৰত হোৱা আক্ৰমণৰ মূল অভিযুক্তক চিনাক্ত কৰিছে অসম আৰক্ষীয়ে। অভিযুক্ত ব্যক্তিজন মৰিগাঁও জিলাৰ ভূৰাগাঁৱৰ ইমদাদুল ইছলাম বুলি জানিব পৰা গৈছে। আৰু নগাঁও-মৰিগাঁও জিলাৰ পৰা অহা বাকী আক্রমণকাৰীকেইজনক আৰক্ষীয়ে চিনাক্ত কৰাৰ লগতে সূত্রই নিশ্চিত কৰিছে যে ইতিমধ্যে অধিকাংশ আক্রমণকাৰীৰ সন্ধান পোৱা গৈছে৷
জানিব পৰামতে এই ঘটনাৰ মাত্ৰ এদিন আগতে, ২০২৫ চনৰ ২৬ এপ্ৰিলত ইছলামক কংগ্ৰেছ দলৰ পৰা বহিষ্কাৰ কৰিছিল।
আৰক্ষী মহাপৰিদৰ্শক অখিলেশ কুমাৰ সিং আৰু নগাঁও আৰক্ষী অধীক্ষক স্বপ্ননীল ডেকাই বটাদ্ৰৱ থানাত সংবাদ মাধ্যমৰ সৈতে কথা বাৰ্তাত দোষীসকলৰ বিৰুদ্ধে কঠোৰ আইনী ব্যৱস্থা গ্ৰহণৰ আশ্বাস প্ৰদান কৰিছে।
এই আক্ৰমণৰ সবিশেষ জানিবলৈ কৰ্তৃপক্ষই মৰিগাঁও আৰু নগাঁওত তদন্ত অব্যাহত ৰাখিছে। ২০২৫ চনৰ ২৭ এপ্ৰিলত নগাঁও জিলাৰ ধিংৰ ডুমডুমিয়াত হোৱা এই ঘটনাই ৰাজ্যৰ পঞ্চায়ত নিৰ্বাচনৰ পূৰ্বে ৰাজনৈতিক উত্তেজনা বৃদ্ধি কৰিছে।
ইফালে কৰ্তৃপক্ষই যদিহে ন্যায্য আৰু নিৰপেক্ষ তদন্ত নিশ্চিত কৰাত ব্যৰ্থ হয় তেন্তে ইয়াৰ প্ৰতিবাদত ৰাজ্যব্যাপী গণতান্ত্ৰিক আন্দোলন গঢ়ি তুলিব বুলি কংগ্ৰেছ দলে সকীয়াই দিছে।
