আঠ বছৰ ধৰি চলি আছে ভুৱা দূতাবাস। গাজিয়াবাদৰ পৰা গ্ৰেপ্তাৰ হোৱা হৰ্ষবৰ্ধন জৈনৰ জালিয়াতিৰ নেটৱৰ্ক কিমান দূৰ প্ৰসাৰিত? কিমান কোটি টকা প্ৰতাৰণা কৰিলে? উত্তৰ প্ৰদেশৰ বিশেষ টাস্ক ফ’ৰ্চে তদন্ত চলাই বিচাৰি পাইছে চাঞ্চল্যকৰ তথ্য।
সংবাদ মাধ্যমৰ বাতৰি অনুসৰি তদন্তকাৰীয়ে এই কথা জানিব পাৰিছে যে হৰ্ষবৰ্ধনে মূলতঃ বিদেশত চাকৰিৰ প্ৰলোভন দি প্ৰৱঞ্চনা চক্ৰ চলাইছিল। তদুপৰি কেইবাটাও বিদেশী বেংক একাউণ্ট উদ্ধাৰ হৈছে। সেইবোৰৰ জৰিয়তে বিত্তীয় লেনদেন কৰা হৈছিল। যোৱা দহ বছৰত হৰ্ষবৰ্ধনে মুঠ ১৬২খন দেশ ভ্ৰমণ কৰিছে। তদন্তকাৰীৰ মতে মুঠতে প্ৰায় ৩০০ কোটি টকা প্ৰতাৰণা কৰা হৈছে।
গাজিয়াবাদৰ এটা ভুৱা দূতাবাসৰ তালাচীৰ সময়ত বিতৰ্কিত ‘গডমেন’ চন্দ্ৰস্বামী আৰু ছৌদি আৰৱৰ অস্ত্ৰ ব্যৱসায়ী আদনান খাশ্বোগীৰ সৈতে হৰ্ষবৰ্ধনৰ এখন ছবি উদ্ধাৰ হয়। এই ‘গডমেন’ চন্দ্ৰস্বামী ৮০ আৰু ৯০ দশকত জনপ্ৰিয় হৈ পৰিছিল। ১৯৯৬ চনত আৰ্থিক অনিয়মৰ বাবে গ্ৰেপ্তাৰ কৰা হৈছিল তেওঁক। সেই সময়ত তদন্তকাৰীয়ে গডমেনৰ আশ্ৰমত অনুসন্ধান কৰি আদনান খাশ্বোগীৰ সৈতে হোৱা বিত্তীয় লেনদেনৰ বিষয়ে জানিব পাৰিছিল।
এছটিএফে জানিব পাৰিছে যে ‘গডমেন’ চন্দ্ৰস্বামীয়ে হৰ্ষবৰ্ধনক খাশ্বোগীৰ লগত চিনাকি কৰাই দিছিল। একেলগে তেওঁলোকে মুঠ ২৫টা শ্বেল কোম্পানী (মাথোঁ কাগজে-পত্ৰেই থকা কোম্পানী) আৰম্ভ কৰিছিল। এই কোম্পানীসমূহৰ জৰিয়তে বিত্তীয় লেনদেন কৰা হৈছিল আৰু ঋণ প্ৰদানৰ নামত একাধিক বিত্তীয় কেলেংকাৰীৰ তথ্য উপলব্ধ হৈছে। অৱশ্যে তদন্তকাৰীয়ে ইতিমধ্যে গম পাইছিল যে হৰ্ষবৰ্ধনে হাৱালা নেটৱৰ্ক চলাই আছে।
উল্লেখযোগ্য যে যোৱা ২৩ জুলাইত উত্তৰ প্ৰদেশৰ গাজিয়াবাদৰ কবি নগৰ অঞ্চলৰ এটা ভাড়াঘৰৰ পৰা হৰ্ষবৰ্ধনক গ্ৰেপ্তাৰ কৰা হৈছিল। সেই ভাড়াঘৰত ‘ৱেষ্টাৰকটিকা’ নামৰ এটা মাইক্ৰ’নেচনৰ ভুৱা দূতাবাস চলোৱাৰ অভিযোগ উত্থাপন হৈছে হৰ্ষবৰ্ধনৰ বিৰুদ্ধে।
এছটিএফৰ নয়ডা ইউনিটে ঘৰটোত অভিযান চলাই এখন বিলাসী গাড়ী, ‘ৱেষ্টাৰকটিকা’ৰ বাৰখন কূটনৈতিক পাছপ’ৰ্ট, বৈদেশিক পৰিক্ৰমা মন্ত্ৰালয়ৰ ছীল থকা ভুৱা নথি-পত্ৰ, দুখন ভুৱা পেন কাৰ্ড, বিভিন্ন দেশ আৰু সংগঠনৰ চৌত্ৰিশটা ভুৱা ছীলকে ধৰি একাধিক সামগ্ৰী উদ্ধাৰ কৰে।
