ভাৰত আন্তঃৰাষ্ট্ৰীয় চলচ্চিত্ৰ মহোৎসৱ (আইএফএফআই)-২০১৯ত প্ৰদৰ্শিত হ’ব ব্ৰজেন বৰুৱা পৰিচালিত সত্তৰ দশকৰ জনপ্ৰিয় অসমীয়া কথাছবি ড০ বেজবৰুৱা।
ৰংঘৰ চিনে প্ৰডাকশ্যনৰ প্ৰযোজনাত ১৯৬৯ চনৰ ৭ নৱেম্বৰত ড০ বেজবৰুৱাই চলচ্চিত্ৰ গৃহত মুক্তি লাভ কৰিছিল।
অসমৰ বিভিন্ন প্ৰান্তত ইনডোৰ আৰু আউটডোৰ শ্বুটিং সম্পন্ন কৰা ড০ বেজবৰুৱা প্ৰথমখন অসমীয়া চলচ্চিত্ৰ।
ব্যৱসায়িকভাৱে সফল হোৱা অসমীয়া চলচ্চিত্ৰখনত নিপন গোস্বামী, ৰেণু শইকীয়া, মেঘালী দেৱী, বিজু ফুকন আদিৰ দৰে অভিনেতাই শক্তিশালী অভিনয় কৰিছিল।
এলি আহমেদ আৰু ব্ৰজেন বৰুৱাৰ গীতৰ কথাৰে চলচ্চিত্ৰখনৰ সংগীত ব্যৱস্থাপনা আছিল ৰমেন বৰুৱাৰ।
ড০ বেজবৰুৱাৰ জনপ্ৰিয় গীত ‘জিলিকা জিলিকা তৰাৰ কথাৰে’, ‘কি নাম দি মাতিম’ বৰ্তমান সময়তো অসমীয়াৰ মুখে মুখে শুনিবলৈ পোৱা যায়।
জনপ্ৰিয় অসমীয়া চলচ্চিত্ৰ ড০ বেজবৰুৱা ‘শিৱম’ নামেৰে হিন্দী ভাষাতো নিৰ্মাণ কৰা হৈছিল।
