আজৱ বিশ্বাসৰ বাবেই দেউতাকে গোবৰৰ লেপনেৰে ঢাকিলে কইনাৰ গাড়ী
প্ৰতিগৰাকী পিতৃৰে নিজৰ কন্যা সন্তান গৰাকীক দোলাত উঠাই জোৱায়েকৰ গৃহলৈ উলিয়াই দিয়াৰ সপোন থাকে, বিত্তবান পিতৃৰ দোলাৰ পৰিৱৰ্তে আনকি হেলিকপ্তাৰৰো সোপন থাকে।
এইক্ষেত্ৰত মহাৰাষ্ট্ৰৰ কোহলাপুৰৰ এগৰাকী পিতৃয়ে সম্পূৰ্ণ ব্যতিক্ৰমী ৰূপৰে নিজৰ কন্যাক স্বামী গৃহলৈ উলিয়াই দিছে।
মহাৰাষ্ট্ৰৰ এইগৰাকী পিতৃয়ে বিবাহ পৰ্বৰ পাছত নিজৰ কন্যাৰ বিদায়ৰ বাবে সাজু কৰি ৰখা বাহনখন গৰুৰ গোবৰেৰে লিপি দিছে।
পেছাত চিকিৎসক নৱনাথ দুধাল নামৰ ব্যক্তিগৰাকীয়ে তেওঁৰ কন্যাৰ বাবে কিছু উদ্ভাৱনী শৈলীৰে কাম কৰা বুলি দাবী কৰে।
নৱনাথ দুধালৰ এই কাৰ্য্যৰ পাছতে বিষয়টো আলহী-অতিথিৰ লগতে মহাৰাষ্ট্ৰৰ বিভিন্ন প্ৰান্তত চৰ্চাৰ বিষয়বস্তু হৈ পৰে।
গৰুৰ গোবৰেৰে সজাই ৰখা বাহনখনৰ ছবি ছ’চিয়েল মিডিয়াত ভাইৰেল হোৱাৰ পাছতে বিভিন্ন লোকে তাত মন্তব্য প্ৰকাশ কৰিছে।
আনহাতে, নৱনাথ দুধালে গোবৰেৰে বাহনখন সজোৱা সম্পৰ্কত সুন্দৰভাৱে বাখ্যা দাঙি ধৰিছে।
চিকিৎসক পিতৃ গৰাকীয়ে কন্যাৰ বিবাহ অনুষ্ঠানক মানুহৰ জীৱনত গোবৰৰ উপকাৰিতাৰ বিষয়ে সজাগ কৰি তোলাৰ বাবে এক মঞ্চ হিচাপে ব্যৱহাৰ কৰিছে বুলি উল্লেখ কৰে।
বিশেষ তথ্য প্ৰকাশ নকৰাকৈ দুধালে গৰুৰ গোবৰক কেন্সাৰ প্ৰতিৰোধীৰ লগতে বিভিন্ন ৰোগৰ উপশমকাৰী বুলি কয়।
তেওঁ গোবৰে গোলকীয় উষ্ণতা ৰোধৰ ক্ষেত্ৰত বিশেষ ভূমিকা পালন কৰে বুলিও মত প্ৰকাশ কৰাৰ লগতে ই মোবাইল বিকিৰণ ৰোধৰ ক্ষেত্ৰতো সহায় কৰে বুলি উল্লেখ কৰে।
গাড়ীত গোবৰ সানি দিলে ই গাড়ীৰ উত্তাপ আৰু শীতৰ পৰা ৰক্ষা পৰাৰ ক্ষেত্ৰত অন্তৰক হিচাপেও কাম কৰে বুলিও তেও কয়।