বিশ্বজুৰি নৰ সংহাৰ চলোৱা ক’ৰ’না সংক্ৰমণ প্ৰতিৰোধ কৰিবলৈ দেশত অব্যাহত আছে ল’কডাউন।
প্ৰধানমন্ত্ৰী নৰেন্দ্ৰ মোদীৰ নিৰ্দেশত যোৱা ১৫ এপ্ৰিলৰ পৰা ২০ এপ্ৰিললৈকে দেশত ল’কডাউন অতি কঠোৰ ভাৱে পালন কৰা হৈছে।
তেনে এক সময়তে চুবুৰীয়া ৰাজ্য অৰুণাচল প্ৰদেশত কিছু লোকে বিৰল প্ৰজাতিৰ এটা প্ৰকাণ্ড কিং কোব্ৰা মাৰি ভোজ খোৱা ভিডিঅ’ চ’ছিয়েল মিডিয়াত ভাইৰেল হৈ পৰিছে।
ভিডিঅ’টোত দেখা গৈছে কেইজমান লোকে ১২ ফুট দৈৰ্ঘ্যৰ কিং কোব্ৰাটো হত্যা কৰি কলপাতত চাফা কৰাৰ দৃশ্য।
লোককেইজনে কিং কোব্ৰাটো হাবিৰ মাজত হত্যা কৰাৰ দৃশ্যটো অতি গৰ্বৰে বন্দী কৰিছে ভিডিঅ’টোত।
ভিডিঅ’টোত এজন লোকৰ মুখত শুনা যায় যে ল’কডাউনৰ ফলত তেওঁলোকৰ খাদ্য সামগ্ৰী মজুত নথকাত এইদৰে কিং কোব্ৰা চিকাৰ কৰিছে।
‘আমি হাবিত বনৰীয়া খাদ্য বস্তু বিচাৰি গৈছিলো আৰু তেতিয়াই আমি কিং কোব্ৰাটো বিচাৰি পাওঁ।’ এজন লোকে ভিডঅ’টোত এইদৰে কয়।
এতিয়ালৈকে অৰুণাচল প্ৰদেশৰ বন বিভাগে এই সন্দৰ্ভত কোনা ধৰণৰ প্ৰতিক্ৰিয়া প্ৰকাশ কৰা নাই।
অৰুণাচল প্ৰদেশৰ বন্যপ্ৰাণী উপ মুখ্য ৱাৰ্ডেন উমেশ কুমাৰৰ পৰা এই সন্দৰ্ভত প্ৰতিক্ৰিয়া জানিবলৈ যোগাযোগ কৰাৰ চেষ্টা কৰা হৈছিল যদিও বাতৰি প্ৰস্তুত কৰি থকা পৰ্যন্ত তেওঁৰ সৈতে যোগাযোগ সম্ভৱ হোৱা নাই।
উল্লেখ্য যে অৰুণাল প্ৰদেশ হৈছে বহুৰকেইটা সৰ্প প্ৰজাতিৰ আৱাসভূমি।
শেহতীয়াকৈ অৰুণাচল প্ৰদেশৰ পাখ্খে ব্যাঘ্ৰ প্ৰকল্পত বিষাক্ত প্ৰজাতিৰ এবিধ সৰ্প আৱিষ্কাৰ কৰা হৈছে। ২০১৯ চনৰ জুলাই মাহত আৱিষ্কাৰ কৰা উক্ত সৰ্পবিধৰ নাম ট্ৰিমেৰেচুৰুছ চালাজাৰ ৰখা হৈছে।
