দুধনৈ ব্যৱসায়ী সন্থাত বৃহৎ বিত্তীয় অনিয়ম আৰু কেলেংকাৰী সংঘটিত হৈছে ৷ আঢ়ৈ লক্ষাধিক টকাৰ বৃহৎ বিত্তীয় কেলেংকাৰীত নাম সাঙোৰ খাইছে সম্পাদক স্বপন কুমাৰ দে’ৰ ৷ বৃহৎ বিত্তীয় খেলিমেলিৰে “দুই লাখ আঠষষ্ঠি হাজাৰ টকা” সৰকালে সম্পাদক স্বপন কুমাৰ দেই ৷
এই কেলেংকাৰীত সন্থাৰ পৰা বহিস্কৃত হৈছে সম্পাদক স্বপন কুমাৰ দে ৷ বিশেষ অনুসন্ধানেৰে হিচাপ পৰীক্ষকৰ দ্বাৰা পৰীক্ষা কৰি বৃহৎ বিত্তীয় খেলিমেলি ধৰা পেলায় সমিতিয়ে ৷
দুধনৈ গোৱালপাৰা জিলাৰ অন্যতম ব্যৱসায়ৰ প্ৰাণকেন্দ্ৰ তথা ৰাভা হাছঙৰ সদৰ ৷ দুধনৈ ব্যৱসায় সন্থাই বিভিন্ন সময়ত বিভিন্ন উন্নয়নমুলক কাম কৰি অহাৰ লগতে বহু লোকক বিপদৰ সময়ত দান বৰঙণি আগবঢ়াই আহিছে ৷ তাৰ মাজতে কাৰ্যকালৰ মাত্ৰ তিনি মাহৰ ভিতৰতে বিত্তীয় খেলিমেলিৰে সম্পাদকে আত্মসাৎ কৰে বৃহৎ পৰিমাণৰ ধন ৷
ইপিনে, টকা আত্মসাত কৰি আত্মগোপন কৰে সম্পাদকজনে ৷ মাত্ৰ কেইবামাহৰ ভিতৰতে সম্পাদকে মাহিলী বৰঙণি, বিশেষ বৰঙণি, সদস্য নবীকৰণৰ ধনৰ হিচাপ খেলিমেলি কৰাৰ লগতে ৰচিদ বহী নষ্ট আৰু তথ্য লুকুৱাই ধন আত্মসাত কৰে৷
তদুপৰি, ভুৱা ভাউচাৰ দাখিল কৰি বৃহৎ ধন আত্মসাৎ কৰাৰ অভিযোগ সংবাদমেল যোগে দিয়ে কাৰ্যকৰী সমিতিখনে ৷
ইতিমধ্যে সম্পাদক পদৰ লগতে সমিতিৰ সাধাৰণ সদস্য পদৰ পৰাও বহিষ্কাৰ কৰা হৈছে স্বপন কুমাৰ দে’ক ৷ আনহাতে, অহা পোন্ধৰ জুনৰ ভিতৰত প্ৰাক্তন সম্পাদকক টকা ওভতাই দিয়াৰ সময়সীমা বান্ধি দিছে কাৰ্যকৰী সমিতিয়ে ৷ অন্যথা আইনী ব্যৱস্থা লোৱাৰ হুংকাৰ দিছে সমিতিয়ে ৷
