বলপূৰ্বক মন্দিৰৰ গৰ্ভগৃহত প্ৰৱেশ, আৰক্ষী জোৱানৰ সৈতে বিবাদ, আইন-শৃংখলা ৰক্ষাত বাধা দিয়াৰ অভিযোগ। ঝাৰখণ্ড আৰক্ষীয়ে বিজেপিৰ দুই সাংসদৰ বিৰুদ্ধে গোচৰ ৰুজু কৰিছে। এজন ঝাৰখণ্ডৰ গোড্ডাৰ বিজেপি সাংসদ নিশিকান্ত ডুবে আৰু আনজন উত্তৰ-পূব দিল্লীৰ সাংসদ মনোজ তিৱাৰী।
ঝাৰখণ্ডৰ দেওঘৰৰ বাবা বৈদ্যনাথ মন্দিৰত শাওণ মাহৰ প্ৰতি সোমবাৰে ভক্তৰ ব্যাপক ভিৰ হয়। সেয়ে সেই সময়ত ভিআইপি বা ভিভিআইপিসকলক মন্দিৰত প্ৰৱেশ কৰাত নিষেধাজ্ঞা আৰোপ কৰা হয়।
যোৱা ২ আগষ্টত নিষেধাজ্ঞা প্ৰযোজ্য হৈ থকাৰ সময়তে নিশিকান্ত আৰু মনোজ তিৱাৰীয়ে পূজা দিবলৈ গৈছিল। অভিযোগ অনুসৰি আৰক্ষীৰ আপত্তি সত্ত্বেও তেওঁলোকে এদল লোকৰ সৈতে মন্দিৰ গৰ্ভগৃহত প্ৰৱেশ কৰে।
সেই সময়ত আকৌ ‘কেঁচা জল পূজা’ৰ পৰম্পৰা চলি আছিল। মন্দিৰৰ মুখ্য পুৰোহিত কাৰ্তিক নাথ ঠাকুৰে অভিযোগ কৰিছে যে হঠাতে ভিভিআইপিৰ প্ৰৱেশে ‘কেঁচা জল পূজা’ অনুষ্ঠান পালনতো সমস্যাৰ সৃষ্টি কৰে।
মুখ্য পুৰোহিতৰ অভিযোগৰ ভিত্তিত হেমন্ত ছোৰেনৰ অধীনত থকা ঝাৰখণ্ড চৰকাৰৰ আৰক্ষীয়ে বিজেপিৰ দুই সাংসদৰ বিৰুদ্ধে গোচৰ ৰুজু কৰিছে। তেওঁলোকৰ বিৰুদ্ধে অনাধিকাৰ প্ৰৱেশ, ধৰ্মীয় উপাসনাত বাধা দিয়া, চৰকাৰী কামত বাধা দিয়া আদি একাধিক অভিযোগ উত্থাপন কৰা হৈছে। ঝাৰখণ্ড আৰক্ষীয়ে দাবী কৰিছে যে সাংসদ দুগৰাকীৰ বাবে সাধাৰণ ভক্তসকলৰ মাজত আতংকৰ সৃষ্টি হয়।
অৱশ্যে এই এফআইআৰৰ আঁৰত বিজেপিয়ে ৰাজনৈতিক প্ৰতিশোধ দেখিছে। ঝাৰখণ্ড ৰাজ্যিক বিজেপিৰ সভাপতি বাবুলাল মাৰাণ্ডীয়ে কয়, “ঝাৰখণ্ড চৰকাৰে নিকৃষ্টতাৰ সীমাত উপনীত হৈছে। আইনৰ ৰক্ষকসকলে জনপ্ৰতিনিধিৰ বিৰুদ্ধে ষড়যন্ত্ৰ কৰিছে।” নিশিকান্তে নিজেই ছ’চিয়েল মিডিয়াত কয়, “যদি পূজা কৰাটো অপৰাধ হয়, তেন্তে মই নিজেই আত্মসমৰ্পণ কৰিবলৈ সাজু। এনেয়েও মোৰ বিৰুদ্ধে ৫১টা গোচৰ আছে।”
