ৰাতিপুৱাই ডিজনীলেণ্ডত অগ্নিকাণ্ড। কেলিফৰ্ণিয়াৰ আনাহাইমৰ ডিজনীলেণ্ড ৰিজৰ্টত সংঘটিত হয় এই ঘটনা। স্থানীয় সময় অনুসৰি শুকুৰবাৰে পুৱা ৰিজ’ৰ্টখনৰ পাৰ্কিং ল’টত সংঘটিত হয় এই অগ্নিকাণ্ড। নিমিষতে কেইবাখনো গাড়ী জুইত জাহ যায়।
আনাহাইম অগ্নিনিৰ্বাপক বাহিনীৰ এজন বিষয়াই জনোৱা মতে, স্থানীয় সময় অনুসৰি পুৱা প্ৰায় ১০ বজাত ডিজনীলেণ্ডত অগ্নিকাণ্ডৰ খবৰ পোৱা গৈছিল।
খবৰ অনুসৰি ডিজনীলেণ্ডৰ পিক্সাৰ পালছ পাৰ্কিং লটত প্ৰথম আঠখন গাড়ীত জুই লাগিছিল। তাৰ পৰাই ওচৰতে ৰখাই থোৱা বাকী থকা গাড়ীবোৰলৈ জুই বিয়পি পৰে। পিছত অগ্নিনিৰ্বাপক বাহিনী উপস্থিত হৈ জুই নিয়ন্ত্ৰণ কৰে।
আন্তঃৰাষ্ট্ৰীয় সংবাদ সংস্থাৰ সূত্ৰ অনুসৰি পাৰ্কিং লটত ৰখাই থোৱা ১২খন গাড়ী প্ৰায় সম্পূৰ্ণৰূপে জ্বলি যায় এই অগ্নিকাণ্ডত। অগ্নিকাণ্ডৰ খবৰ বিয়পি পৰাৰ লগে লগে ৰিজ’ৰ্টখনত আতংক বিয়পি পৰে। তাত থকা সকলোৱে ওলাই আহে।
যিসকলৰ গাড়ী পাৰ্কিং লটত আছিল তেওঁলোকে ক্ষতিৰ আশংকাত তালৈ লৰালৰিকৈ আহিছিল। কিন্তু দুৰ্ঘটনাৰ কাৰণৰ তদন্তৰ বাবে সমগ্ৰ অঞ্চলটো ঘেৰাও কৰি ৰখা হয়। এই দুৰ্ঘটনাৰ বাবেই ৰিজৰ্ট আৰু পাৰ্কখন সাময়িকভাৱে বন্ধ হৈ আছে।
ছ’চিয়েল মিডিয়াত প্ৰচাৰিত ভিডিঅ’ত দেখা গৈছে যে জুইৰ তীব্ৰ শিখাত ইখনৰ পিছত সিখন গাড়ী জ্বলি আছে। অঞ্চলটো ক’লা ধোঁৱাই আৱৰি ধৰিছে। অৱশ্যে এঘণ্টাৰ ভিতৰতে অগ্নিনিৰ্বাপক বাহিনীয়ে সেয়া নিয়ন্ত্ৰণলৈ আনে।