দেশৰ অন্যতম ৰাজ্য কেৰালাত সংঘটিত হৈছে এক শোকাবহ ঘটনা৷এই ঘটনা হ’ল এক অগ্নিকাণ্ড৷ কেৰালাৰ নীলেশ্বৰম মন্দিৰত সংঘটিত অগ্নিকাণ্ডৰ সৈতে জড়িত দুজন লোকক আটক কৰিছে আৰক্ষীয়ে। এই অগ্নিকাণ্ডত কমেও ১৫৪ জন লোক আহত হয়। ইয়াৰে কিছুমানৰ অৱস্থা সংকটজনক। ইমান ডাঙৰ দুৰ্ঘটনা কেনেকৈ হ’ল সেই সন্দৰ্ভত ইতিমধ্যে বিভিন্ন মহলে প্ৰশ্ন উত্থাপন কৰিবলৈ আৰম্ভ কৰিছে। ঘটনা সন্দৰ্ভত আৰক্ষীয়ে তদন্ত অব্যাহত ৰাখিছে। প্ৰাথমিক তদন্তত প্ৰকাশ পাইছে যে মন্দিৰ কৰ্তৃপক্ষৰ গাফিলতিৰ বাবেই এই দুৰ্ঘটনা সংঘটিত হৈছে!
সোমবাৰে নিশা নীলেশ্বৰমৰ কাছাৰগড় জিলাৰ এটা মন্দিৰত ধৰ্মীয় অনুষ্ঠানৰ আয়োজন কৰা হয়। সেই অনুষ্ঠানত অনুৰাগীৰ ভিৰে সকলোৰে চকু কপালত তুলিছিল। এই উপলক্ষে মন্দিৰ কৰ্তৃপক্ষই আতচবাজী প্ৰদৰ্শনৰ আয়োজন কৰে।প্ৰত্যক্ষদৰ্শীৰ ভাষ্য অনুসৰি অনুষ্ঠানৰ সময়ত জুই গুদামটোলৈ ছিটিকি পৰে। তেতিয়াই এই ঘটনা সংঘটিত হয়৷ গুদামত বৃহৎ পৰিমাণৰ ষ্টেকো জমা কৰি ৰখা হৈছিল। ফলত দ্ৰুতগতিত বিয়পি পৰে জুই।
নিশা ঘটনাস্থলীত উপস্থিত হয় জিলা দণ্ডাধীশ, আৰক্ষী অধীক্ষক। কেনেদৰে এই অগ্নিকাণ্ড সংঘটিত হ’ল তদন্ত অব্যাহত ৰাখিছে আৰক্ষীয়ে। কাছাৰগড়ৰ আৰক্ষী অধীক্ষক ডি শিল্পই কয় যে মন্দিৰ কৰ্তৃপক্ষই নিৰাপত্তাৰ প্ৰট’কল মানি চলাত ব্যৰ্থ হৈছে। কেৱল সেয়াই নহয়, মন্দিৰ কৰ্তৃপক্ষই আতচবাজী প্ৰদৰ্শনৰ বাবে প্ৰয়োজনীয় অনুমতি লোৱা নাছিল। জিলা আয়ুক্ত কে ইনবাছেকাৰে কয় যে প্ৰক্ৰিয়াগত ভুল কি আছিল সেই কথা জানিবলৈ তদন্তৰ প্ৰয়োজন।
প্ৰত্যক্ষদৰ্শীয়ে বৰ্ণনা কৰে যে কেনেকৈ আতচবাজীৰ পৰা জুই আৰম্ভ হৈছিল। মূল অনুষ্ঠানৰ বাবে গুদামত বৃহৎ পৰিমাণৰ বাজি মজুত কৰা হৈছিল। যাৰ দাম কমেও ২৫ হাজাৰ টকা। ইয়াৰ সকলোবোৰ ছাইলৈ পৰিণত হৈছে। আহতসকলক উদ্ধাৰ কৰি মেংগালুৰু, কান্নুৰ আৰু কাছাৰগড়ৰ কেইবাখনো চিকিৎসালয়ত ভৰ্তি কৰোৱা হৈছে।
ছচিয়েল মিডিয়াত ভাইৰেল হৈছে এই ঘটনাৰ কেইবাটাও ভিডিঅ’। সেই ভিডিঅ’বোৰত দেখা গৈছিল যে সভাস্থলীত মানুহৰ বৃহৎ ভিৰ আছিল। হঠাৎ গুদামটোত এটা জোৰেৰে বিস্ফোৰণ ঘটিল। বিস্ফোৰণৰ তীব্ৰতাৰ বাবে সমীপৰ এক বৃহৎ অঞ্চলত বিয়পি পৰে জুই। লগে লগে সেই অঞ্চলটো ধোঁৱাই আৱৰি ধৰিলে।
