চীনৰ ৰাষ্ট্ৰপতি হোৱাৰ পাছত প্ৰথমবাৰৰ বাবে তিব্বত ভ্ৰমণ কৰিছে ৰাষ্ট্ৰপতি সি জিনপিঙে। বুধবাৰে তিব্বতলৈ আহিলেও শুকুৰবাৰেহে বেইজিঙৰ সংবাদ মাধ্যমত প্ৰকাশ পাইছে এই খৱৰ।
উল্লেখ্য যে ১৯৯০ চনত তিব্বতলৈ শেষবাৰ চীনৰ ৰাষ্ট্ৰপতিয়ে ভ্ৰমণ কৰিছিল। অৱশ্যে, জিনপিঙে পূৰ্বেও তিব্বতলৈ আহিছিল যদিও ৰাষ্ট্ৰপতি হিচাপে এইবাৰ প্ৰথম।
চীনৰ ৰাষ্ট্ৰপতিগৰাকীৰ এই আচম্বিত তিব্বত ভ্ৰমণত বিভিন্ন মহলত ব্যাপক চৰ্চা লাভ কৰিছে।
বাতৰি অনুসৰি, বুধবাৰে ৰাষ্ট্ৰপতি জিনপিং নিংচি মেনলিং বিমানবন্দৰত নামে যদিও শুকুৰবাৰেহে চীনৰ সংবাদ মাধ্যমে এই বাতৰি প্ৰকাশ কৰে। তদুপৰি, বেইজিঙৰ ফালৰ পৰা এটা ভিডিঅ’ও প্ৰকাশ কৰা হৈছে।
জিনপিঙে তিব্বতৰ নেং নদীৰ দলং তথা কাষৰীয়া স্থাসমূহ পৰিদৰ্শন কৰে। নদীৰ পাৰ সংযোগী অঞ্চলৰ পৰিস্থিতিও তেওঁ পৰ্যবেক্ষণ কৰে।
বাতৰি অনুসৰি, বৃহস্পতিবাৰে চীনৰ ৰাষ্ট্ৰপতিগৰাকীয়ে তিব্বতৰ ৰাজধানী লাছালৈ যায়। তাৰপাছত ছিছুৱান-তিব্বত ৰে’ল প্ৰকল্পৰ কামৰো খতিয়ান লয়।
কিন্তু চীনৰ ৰাষ্ট্ৰপতিগৰাকীৰ এই হঠাৎ তিব্বত ভ্ৰমণক লৈ স্বাভাৱিকতে বিভিন্ন জল্পনা-কল্পনা আৰম্ভ হৈছে।
ইয়াৰ পূৰ্বে জিনপিঙে ১৯৯৮চনত প্ৰথমবাৰ ফুজিয়ান প্ৰদেশৰ দলীয় মুৰব্বী হিচাপে তিব্বতলৈ আহিছিল। তাৰ পাছত ২০১১চনত উপ ৰাষ্ট্ৰপতি হিচাপে তিব্বত ভ্ৰমণলৈ আহিছিল।
চীনৰ ৰাষ্ট্ৰপতি হিচাপে ১৯৯০চনত শেষবাৰ তিব্বতলৈ আহিছিল তদানীত্বন ৰাষ্ট্ৰপতি জিয়াং জেমিন।
একাংশ ৰাজনৈতিক পৰ্যবেক্ষকৰ মতে তিব্বতক চীনৰ অবিচ্ছেদ্য অংগ হিচাপে দেখুৱাবলৈকে চীনৰ ৰাষ্ট্ৰপতিগৰাকীয়ে এইদৰে হঠাতে তিব্বত ভ্ৰমণলৈ আহে।
দালাই লামাৰ বিশাল অনুৰাগীসকলক তিব্বত যে চীনৰ অংশ সেই বাৰ্তা দিবলৈকে জিনপিঙৰ এই ভ্ৰমণ বুলি অনুমান কৰা হৈছে।
