ৰাছিয়া-ইউক্ৰেইন যুদ্ধ: ৰাষ্ট্ৰসংঘৰ মজিয়াত প্ৰথমবাৰৰ বাবে ৰাছিয়াৰ বিপক্ষে ভোট দিলে ভাৰতে
সাত মাহত সোমাল ৰাছিয়া আৰু ইউক্ৰেইনৰ মাজত চলি থকা যুদ্ধ। ২৪ ফেব্ৰুৱাৰীত ৰাছিয়াই ইউক্ৰেইন আক্ৰমণ কৰাৰ পিছত তৃতীয় বিশ্বযুদ্ধৰ আশংকাত বিশ্ব সম্প্ৰদায় ত্ৰস্তমান হৈ পৰিছিল যদিও এই যুদ্ধ দেশ দুখনৰ মাজতে সীমাবদ্ধ হৈ ছয়মাহ অতিক্ৰম কৰিলে।
ইতিমধ্যে ৰাছিয়াৰ আক্ৰমণে প্ৰায় ধ্বংসস্তূপত পৰিণত কৰিছে ইউক্ৰেইনক। ৰাছিয়াৰ এই আগ্ৰাসী চৰিত্ৰৰ বিৰুদ্ধে স্থিতি গ্ৰহণ কৰি বিশ্বৰ ৰাষ্ট্ৰসমূহে যুদ্ধ বন্ধ কৰিবলৈ দাবী জনাই আহিছে যদিও নিজৰ স্থিতিত অটল ৰাছিয়া সৈমান হোৱা নাই।
এই যুদ্ধক কেন্দ্ৰ কৰি ৰাষ্ট্ৰসংঘৰ মজিয়াত কেইবাবাৰো ৰাছিয়াৰ বিৰুদ্ধে মতদান সাব্যস্ত কৰিছে ৰাষ্ট্ৰসমূহে। কিন্তু প্ৰতিবাৰেই গোষ্ঠী নিৰপেক্ষ স্থিতিৰে ভাৰতে ৰাছিয়াৰ বিৰুদ্ধে ভোটদানৰ পৰা আঁতৰি আছিল।
কিন্তু বুধবাৰে ৰাষ্ট্ৰসংঘৰ নিৰাপত্তা পৰিষদত ইউক্ৰেইন সন্দৰ্ভত ভোটৰ সময়ত ভাৰতে প্ৰথমবাৰৰ বাবে ৰাছিয়াৰ বিৰুদ্ধে ভোট দান কৰে।
এই ভোটদান অনুসৰিয়ে নিৰাপত্তা পৰিষদে ইউক্ৰেইনৰ ৰাষ্ট্ৰপতি ভলোডিমিৰ জেলেনস্কিক ভিডিঅ’ টেলি-কনফাৰেন্সৰ জৰিয়তে এখন সভা সম্বোধন কৰিবলৈ আমন্ত্ৰণ জনায়।
ফেব্ৰুৱাৰীত ৰাছিয়াৰ সামৰিক আক্ৰমণ আৰম্ভ হোৱাৰ পিছত ভাৰতে এয়েই প্ৰথমবাৰৰ বাবে ইউক্ৰেইন সন্দৰ্ভত ৰাছিয়াৰ বিৰুদ্ধে ভোট দিছে।
নতুন দিল্লীয়ে গোষ্ঠী নিৰপেক্ষ চৰিত্ৰ অটুত ৰাখি এই বিষয়ত ৰাষ্ট্ৰসংঘৰ নিৰাপত্তা পৰিষদত ভোটদানৰ পৰা বিৰত আছিল আৰু ৰাছিয়া-ইউক্ৰেইনক কূটনৈতিক পথেৰে সমস্যা সমাধানত আগবঢ়াৰ ক্ষেত্ৰত সমৰ্থন জনাইছিল।
ভাৰতৰ এই স্থিতিৰ ফলত আমেৰিকা যুক্তৰাষ্ট্ৰৰ লগতে পশ্চিমীয়া শক্তিসমূহে ভাৰত কটূ সমালোচনাও কৰিছিল।
উল্লেখ্য যে বুধবাৰে ইউক্ৰেইনে স্বাধীনতাৰ ৩১ তম বাৰ্ষিকী পালন কৰে। স্বাধীনতাৰ এই ক্ষণত ৰাষ্ট্ৰসংঘৰ নিৰাপত্তা পৰিষদে সাত মাহ ধৰি চলি থকা যুদ্ধৰ বুজ ল’বলৈ এখন বৈঠক অনুষ্ঠিত কৰিছিল।