ইছলামধৰ্মী লোকসকলৰ পৱিত্ৰ পীঠস্থান মক্কাত প্ৰথমবাৰৰ বাবে দেখিবলৈ পোৱা গৈছে এক ব্যতিক্ৰমী দৃশ্য।
ৰক্ষণশীল দেশ হিচাবে জনাজাত চৌদি আৰৱত এইবাৰ নজিৰ সৃষ্টি কৰি প্ৰথমবাৰৰ বাবে মহিলা নিৰাপত্তা কৰ্মী নিয়োজিত হৈছে হজ যাত্ৰীৰ সুৰক্ষাত।
কথাষাৰ শুনিবলৈ কিছু আচহুৱা যেন লাগিলেও এয়া এতিয়া বাস্তৱত পৰিণত হৈছে।
চৌদি আৰৱৰ এগৰাকী যুৱতী, নাম তেওঁৰ মনা।মহিলাক সদায় বোৰ্খাৰ মাজতে আৱদ্ধ কৰি ৰাখিব বিচৰা দেশ খনৰ বাসিন্দা মনা এতিয়া ব্যস্ত সামৰিক পোছাক পৰিধান কৰি হজযাত্ৰীৰ সুৰক্ষা প্ৰদানত।
মক্কাৰ মছজিদৰ চৌদিশে মনাৰ দৰেই আন বহু যুৱতীয়ে পুৰুষৰ দৰেই সামৰিক পোছাক পিন্ধি তহল দি থকা দেখিবলৈ পোৱা গৈছে।
এই প্ৰসংগতে মনাই কৈছে—’মই মোৰ স্বৰ্গগামী পিতৃৰ পদাংক অনুসৰণ কৰিয়েই নিৰাপত্তা বাহিনীত যোগ দিছো।মোৰ পিতৃও এগৰাকী নিৰাপত্তা বাহিনীৰ জোৱান আছিল। মৃত্যুৰ পিছত মই তেওঁৰ আধৰুৱা সপোন পূৰণ কৰিব বিচাৰিছো’।
উল্লেখ্য পৰম্পৰা ভংগ কৰি চলিতবৰ্ষৰ এপ্ৰিল মাহৰে পৰা চৌদি আৰৱৰ বহু যুৱতীয়ে দেশ খনৰ নিৰাপত্তা বাহিনীত যোগদান কৰি মক্কাত হজযাত্ৰীৰ সুৰক্ষাত নিয়োজিত হৈছে। ইছলামিক দেশ খন বহু যুৱতীয়ে এতিয়া খাকী অথবা সামৰিক পোছাক পিন্ধি পুৰুষৰ দৰেই সমানে নিৰাপত্তাৰ কামত জৰিত হৈ পৰিছে।
উল্লেখ্য চৌদি ৰজা ৰাজকুমাৰ মহম্মদ বিন ছলমানে বিগত কিছু বছৰ ধৰি দেশ খনৰ সামাজিক তথা অৰ্থনৈতিক সংস্কাৰৰ বাবে প্ৰচেষ্টা অব্যাহত ৰাখিছে।
তাৰেই ফলশ্ৰুতিত ৰক্ষণশীল দেশ হিচাবে পৰিচিত চৌদি আৰৱৰ মহিলাই এতিয়া চাৰিচকীয়া গাড়ীৰ লগতে মটৰ চাইকেল চলোৱাৰ অনুমতি লাভ কৰিছে।ৰজা ছলমনে গ্ৰহণ কৰা ভিজন ২০৩০ ৰ সুবাদতে এতিয়া চৌদি মহিলায়ো বহু ক্ষেত্ৰত পুৰুষৰ সমানে খোজ পেলাবলৈ সক্ষম হৈছে।
ছলমনে চৌদি আৰৱত বিদেশী বিনিয়োগৰ পথ প্ৰশস্ত কৰাৰ লগতে মহিলাসকলকো বহু বিষয়ত স্বাধীনতা প্ৰদান কৰিছে।
সেইবাবেই সামৰিক তথা নিৰাপত্তা বাহিনীতো মহিলাই যোগদান কৰাৰ সুযোগ পাইছে। ক’ৰ’না ভাইৰাছে বিশ্বজুৰি সৃষ্টি কৰা আতংকৰ বাবেই এইবাৰো মক্কাত হজযাত্ৰাত কেৱল চৌদি আৰৱৰ লোকসকলকহে অনুমতি প্ৰদান কৰা হৈছে।
এইবেলি সেয়ে নিজৰ দেশৰ হজযাত্ৰীসকলকেই নিৰাপত্তা প্ৰদান কৰিব চৌদি মহিলা নিৰাপত্তা কৰ্মীয়ে। কাব্বাত নিয়োজিত মহিলা নিৰাপত্তা কৰ্মী চামাৰে কয়’ এইক্ষেত্ৰত তেওঁক তেওঁৰ পৰিয়ালে পূৰ্ণ সমৰ্থন জনাইছে। এটা ধৰ্মীয় অনুষ্ঠানত এনেদৰে নিৰাপত্তাত নিয়োজিত হ’বলৈ পাই মই নথৈ সুখী’।
