ৰাজ্যত দেশৰ নাগৰিকক বিদেশী সজাই কৰা হাৰাশাস্তিৰ আন এটা ঘটনা পোহৰলৈ আহিছে। মহম্মদ সোণাউল্লাহ নামৰ এজন লোকক বিদেশী ন্যায়াধীকৰণে বিদেশী বুলি ঘোষণা কৰাৰ পাছত তেওঁক গ্ৰেপ্তাৰ কৰি ডিটেনশ্যন কেম্পলৈ প্ৰেৰণ কৰা হয়।
বিদেশী ন্যায়াধীকৰণৰ আদেশ মৰ্মে অসম আৰক্ষীয়ে ২৮ মে’ত সোণাউল্লাহক কামৰূপ জিলাৰ বকোৰ নিজৰ বাসগৃহৰ পৰা গ্ৰেপ্তাৰ কৰে।
১৯৬৭ চনত বকোত জন্মগ্ৰহণ কৰা সোণাউল্লাহে ১৯৮৭ চনত ভাৰতীয় সৈন্য বাহিনীত যোগদান কৰাৰ পাছত ৩০ বছৰ দেশৰ হৈ সেৱা আগবঢ়াই ২০১৭ চনত সন্মানীয় কেপ্তেইন পদত অধিস্থিত হৈ অৱসৰ গ্ৰহণ কৰে। ২০১৪ চনত তেওঁ জুনিয়ৰ কমিশ্যনাৰ অফিচাৰ হিচাপে পদোন্নতি লাভ কৰাৰ বাবে ভাৰতৰ ৰাষ্ট্ৰপতিৰ পৰা প্ৰমাণ পত্ৰ লাভ কৰে।
ভাৰতীয় সেনা বাহিনীৰ পৰা অৱসৰ গ্ৰহণ কৰাৰ পাছত সোণাউল্লাহে অসম আৰক্ষীৰ সীমা শাখাত উপ পৰিদৰ্শক হিচাপে যোগদান কৰে।
আনহাতে, ঘটনা সন্দৰ্ভত সোণাউল্লাহৰ অধিবক্তা চহিদুল ইছলামে কয় যে বকোত থকা বিদেশী ন্যায়াধীকৰণে সোণাউল্লাহৰ জন্মৰ তাৰিখ আৰু ভাৰতীয় সেনা বাহিনীত যোগদান কৰাৰ তাৰিখৰ খেলিমেলিৰ বাবে তেওঁক বিদেশী বুলি ঘোষণা কৰিছে। ২০০৮ চনৰ পৰা চোনা উল্লাহৰ নামত বিদেশী ন্যায়াধীকৰণত গোচৰ চলি আছিল।
আনহাতে, সোণাউল্লাহ এগৰাকী প্ৰকৃত ভাৰতীয় নাগৰিক হোৱাৰ পৰ্য্যাপ্ত প্ৰমাণ মজুত আছে আৰু অতি শীৰ্ঘে ন্যায়ালয়ত এই সম্পৰ্কে আপীল কৰা হ’ব বুলি বুধবাৰে অধিবক্তা ইছলাম জানিবলৈ দিয়ে।
তদুপৰি অসম প্ৰদেশ কংগ্ৰেছ কমিতিৰ জেষ্ঠ নেতা অপূৰ্ব কুমাৰ ভট্টাচাৰ্যই বুধ বাৰে এখন সংবাদ মেলত প্ৰকৃত ভাৰতীয় লোকক এন আৰ চিৰ নামত কৰা হাৰাশাস্তিৰ পৰিমাণ বৃদ্ধি পাইছে বুলি উল্লেখ কৰে। ভট্টাচাৰ্য্যই ১৯৫১ চনৰ এন আৰ চিত নাম থকা লোকেও হাৰাশাস্তিৰ সন্মুখিন হ’ব লগা হৈছে বুলি কয়।
