মণিপুৰৰ প্ৰাক্তন মুখ্যমন্ত্ৰী এন. বীৰেণ সিঙৰ ভাইৰেল অডিঅ’ ক্লিপ, য’ত তেওঁ ৰাজ্যখনত চলি থকা সাম্প্ৰদায়িক হিংসাৰ দায়িত্ব লোৱাৰ কথা কৈছে। এই ঘটনাই তীব্ৰ চাঞ্চল্যৰ সৃষ্টি কৰিছিল।
এই গোচৰত কেন্দ্ৰীয় চৰকাৰে অডিঅ’ টেপৰ ফৰেনছিক প্ৰতিবেদন প্ৰস্তুত কৰিছে, কিন্তু ছলিচিটৰ জেনেৰেল তুষাৰ মেহতাৰ অনুপস্থিতিৰ কাৰণে প্ৰতিবেদনটো উচ্চতম ন্যায়ালয়ত দাখিল কৰাত বিলম্ব হৈছে।
১৭ এপ্ৰিল, বৃহস্পতিবাৰৰ শুনানিত কেন্দ্ৰীয় চৰকাৰে উচ্চতম ন্যায়ালয়ত জনায় যে অডিঅ’ টেপৰ প্ৰামাণ্যতাৰ ফৰেনছিক পৰীক্ষা সম্পূৰ্ণ হৈছে, কিন্তু তুষাৰ মেহতা উপলব্ধ নথকাৰ কাৰণে প্ৰতিবেদন দাখিল কৰিব পৰা নাই। চৰকাৰৰ হৈ উপস্থিত অধিবক্তাই মুখ্য ন্যায়াধীশ সঞ্জীৱ খান্নাৰ নেতৃত্বত গঠিত বিচাৰপীঠক আশ্বাস দিয়ে যে মেহতাই শীঘ্ৰেই প্ৰতিবেদনখন আদালতত জমা দিব। আদালতে পৰৱৰ্তী শুনানিৰ বাবে ৫ মে’ৰ তাৰিখ নিৰ্ধাৰণ কৰিছে।
উল্লেখ্য যে এই অডিঅ’ ক্লিপটো সংবাদ সংস্থা ‘দ্য ৱায়াৰ’ৰ দ্বাৰা প্ৰকাশিত হোৱাৰ পিছত কেন্দ্ৰীয় গৃহ মন্ত্ৰণালয়ৰ ন্যায়িক আয়োগে ইয়াক গ্ৰহণ কৰিছিল। ইয়াৰ পিছত কুকি অৰ্গেনাইজেশ্যন ফৰ হিউমেন ৰাইটছ ট্ৰাষ্টে উচ্চতম ন্যায়ালয়ত ন্যায়িক তদন্তৰ দাবী জনাই আৰ্জি দাখিল কৰে। তদানীন্তন মুখ্য ন্যায়াধীশ ডি. ৱাই. চন্দ্ৰচুড়ৰ নেতৃত্বত গঠিত বিচাৰপীঠে আবেদনকাৰী সকলক অডিঅ’ ক্লিপৰ প্ৰামাণ্যতাৰ প্ৰতিবেদন দাখিলৰ নিৰ্দেশ দিছিল। ২০২৫ চনৰ ৩ ফেব্ৰুৱাৰীত মুখ্য ন্যায়াধীশ খান্নাৰ বিচাৰপীঠে কেন্দ্ৰীয় চৰকাৰৰ আবেদন গ্ৰহণ কৰি হায়দৰাবাদৰ কেন্দ্ৰীয় ফৰেনছিক বিজ্ঞান পৰীক্ষাগাৰক অডিঅ’ ক্লিপটো পৰীক্ষা কৰি তিনি সপ্তাহৰ ভিতৰত ছীল কভাৰত প্ৰতিবেদন দাখিলৰ নিৰ্দেশ দিয়ে, যাৰ সময়সীমা ২৪ মাৰ্চত শেষ হৈছিল। কিন্তু ২৪ মাৰ্চত শুনানি তালিকাভুক্ত নোহোৱাৰ কাৰণে ১৭ এপ্ৰিলত শুনানি অনুষ্ঠিত হয়।
উল্লেখ্য যে গোচৰৰ প্ৰাৰম্ভিক পৰ্যায়ত এগৰাকী আবেদনকাৰীয়ে ‘ট্ৰুথ লেব’ নামৰ এটা ব্যক্তিগত পৰীক্ষাগাৰৰ প্ৰতিবেদন আদালতত দাখিল কৰিছিল। ট্ৰুথ লেবৰ প্ৰতিবেদনত কোৱা হৈছে যে অডিঅ’ ক্লিপৰ কণ্ঠ আৰু বীৰেণ সিঙৰ কণ্ঠৰ নমুনাৰ মাজত ৯৩% মিল আছে, আৰু দুয়োটা একেজন ব্যক্তিৰ হোৱাৰ “উচ্চ সম্ভাৱনা” আছে।
