কাজিৰঙা ৰাষ্ট্ৰীয় উদ্যানৰ ষষ্ঠ সংযোজন এলেকাৰ লখৰা নামৰ চাপৰিটোৰ পৰা আজি এটা সদ্যজাত মাতৃহাৰা গঁড় পোৱালী উদ্ধাৰ কৰে বনকৰ্মীয়ে৷
লখৰা চাপৰিৰ সমীপতে থকা কাজিৰঙা ৰাষ্ট্ৰীয় উদ্যানৰ শিবে নামৰ বন শিৱিৰৰ বন কৰ্মীয়ে আজি পুৱা এই গঁড় পোৱালীটো অকলশৰীয়া অৱস্থাত প্ৰত্যক্ষ কৰে৷
দীৰ্ঘ সময় ধৰি চাপৰিটোত মাকৰ সন্ধান কৰি বিফল হোৱা বনকৰ্মীয়ে গঁড় পোৱালীটোক প্ৰতিৰক্ষা প্ৰদান কৰি কাজিৰঙা বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰক খবৰ দিয়ে৷
চাপৰিটোত দ্ৰোণ ব্যৱহাৰ কৰিও মাকৰ সন্ধান কৰে বিশ্বনাথ বন্যপ্ৰাণী সংমণ্ডলৰ বনাঞ্চলিক বিষয়া প্ৰাঞ্জল গগৈয়ে৷
শেষত বনাঞ্চলিক বিষয়া প্ৰাঞ্জল গগৈ আৰু অনাৰেৰী ৱাইল্ডলাইফ ৱাৰ্ডেন বাবুলি হাজৰিকাই এখন যন্ত্ৰ চালিত নাৱত উঠাই গড় পোৱালীটোক বোকাখাতৰ ধনশিৰিমুখৰ সমীপত বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰৰ পশু চিকিৎসক ডা৹ চামচুল আলীৰ হাতত অৰ্পণ কৰে৷
সম্প্ৰতি কেন্দ্ৰটোতে পৰ্যবেক্ষণত ৰখা হৈছে কণমানি গড়ঁ পোৱালীটোক৷ মতা পোৱালীটোৰ বয়স ১২/ ১৫ দিনহে হ’ব বুলি জনায় পশু চিকিৎসক ডা৹ চামচুল আলীয়ে৷
