প্ৰসিদ্ধ ক্ৰিকেটাৰ বব চিম্পছনৰ মৃত্যু হৈছে। অষ্ট্ৰেলিয়াৰ প্ৰাক্তন অধিনায়ক তথা প্ৰশিক্ষকগৰাকীয়ে শনিবাৰে ছিডনীত ৮৯ বছৰ বয়সত মৃত্যুবৰণ কৰে। তেওঁ অষ্ট্ৰেলিয়াৰ প্ৰথম বিশ্বকাপ বিজয়ী দলটোৰ প্ৰশিক্ষকো আছিল।
অষ্ট্ৰেলিয়াৰ ক্ৰিকেটৰ অন্যতম প্ৰভাৱশালী ব্যক্তিত্ব আছিল চিম্পছন। ১৯৫৭ চনৰ পৰা ১৯৭৮ চনলৈকে দেশৰ হৈ খেলিছিল। ৬২ খন টেষ্টত গড়ে ৪৬.৮১ ৰানেৰে ৪,৮৬৯ ৰান সংগ্ৰহ কৰিছিল। তেওঁ ৭১টা উইকেটো দখল কৰে। অষ্ট্ৰেলিয়াৰ ক্ৰিকেটত তেওঁ আছিল প্ৰথম পূৰ্ণকালীন প্ৰশিক্ষক।
চিম্পছনে ১১ বছৰ খেলাৰ অন্তত ১৯৬৮ চনত ক্ৰিকেটৰ পৰা অৱসৰ গ্ৰহণ কৰে। কিন্তু ৯ বছৰৰ পিছত ১৯৭৭ চনত কেৰী পেকাৰৰ ৱৰ্ল্ড ছিৰিজ ক্ৰিকেট বিতৰ্কৰ সময়ত অৱসৰ ভংগ কৰি আন্তঃৰাষ্ট্ৰীয় ক্ৰিকেটলৈ উভতি আহে। তেওঁক অধিনায়ক হিচাপে নিযুক্তি দিয়া হয় । তেওঁৰ ১০টা টেষ্ট শতকৰ সকলোবোৰেই অধিনায়ক হিচাপে আহিছিল। এই প্ৰাক্তন অ’পেনাৰজনৰ এটা ট্ৰিপল চেঞ্চুৰী আৰু দুটা ডাবল চেঞ্চুৰীও আছে।
চিম্পছন স্লিপ ফিল্ডাৰ হিচাপে দক্ষ আছিল। তেওঁ ১৬ বছৰ বয়সত নিউ চাউথ ৱেলছৰ হৈ প্ৰথম শ্ৰেণীৰ অভিষেক ঘটায়। তেওঁ কেৰিয়াৰত ২১০২৯ ৰান সংগ্ৰহ কৰিছে। এজন লেগস্পিনাৰ চিম্পছনৰ নামত আছে ৩৪৯টা উইকেট।
১৯৬৪ চনৰ মানচেষ্টাৰ টেষ্টত ইংলেণ্ডৰ বিৰুদ্ধে চিম্পছনে ৩১১ ৰান সংগ্ৰহ কৰিছিল। তেওঁৰ দুটা ডাবল চেঞ্চুৰীও আছে। অধিনায়ক হিচাপে তেওঁৰ বেটিং গড় আছিল ৫৪.০৭।
