হৃদৰোগত আক্ৰান্ত হৈ পৰলোকপ্ৰাপ্তি ভাৰতৰ প্ৰাক্তন ক্ৰিকেটাৰ দিলীপ দোশীৰ

প্ৰাক্তন ভাৰতীয় ক্ৰিকেটাৰ দিলীপ দোশীৰ পৰলোকপ্ৰাপ্তি ঘটিছে। সোমবাৰে লণ্ডনত হৃদৰোগত আক্ৰান্ত হৈ শেষ নিশ্বাস ত্যাগ কৰে দোশীয়ে। তেওঁৰ বয়স আছিল ৭৭ বছৰ।

ভাৰতীয় বাওঁহতীয়া প্ৰাক্তন স্পিনাৰগৰাকীয়ে ৩৩খন টেষ্ট আৰু ১৫খন এদিনীয়া মেচ খেলিছিল। ১৯৭৯ চনত দেশৰ হৈ অভিষেক ঘটোৱা দোশীয়ে ১৯৮৩ চনত অন্তিমখন আন্তঃৰাষ্ট্ৰীয় মেচ খেলিছিল। তেওঁৰ নামত ১১৪ টা টেষ্ট উইকেট আৰু ২২ টা এদিনীয়া উইকেট আছে।

১৯৪৭ চনৰ ২২ ডিচেম্বৰত ৰাজকোটত জন্মগ্ৰহণ কৰা দোশীয়ে ৩২ বছৰ বয়সত চেন্নাইত অষ্ট্ৰেলিয়াৰ বিৰুদ্ধে টেষ্ট খেলত আন্তঃৰাষ্ট্ৰীয় পৰ্যায়ত অভিষেক ঘটায়। সেই টেষ্টত প্ৰথম ইনিংছত ১০৩ ৰানত ৬টা উইকেট দখল কৰিছিল।

অভিষেক টেষ্টত এটা ইনিংছত ৫ বা তাতকৈ অধিক উইকেট দখল কৰাৰ কৃতিত্ব মাত্ৰ ৯ গৰাকী ভাৰতীয়ৰ আছে। দোশী তাৰ ভিতৰত অন্যতম। এৰাপল্লী প্ৰসন্ন, ভাগৱত চন্দ্ৰশেখৰ, শ্ৰীনিবাসৰাঘৱন ভেংকটাৰঘৱন আৰু বিষান সিং বেদীৰ পিছত দোশীয়ে ভাৰতীয় ক্ৰিকেটত স্পিন আক্ৰমণৰ দায়িত্ব গ্ৰহণ কৰিছিল।

তেওঁ প্ৰথম শ্ৰেণীৰ ক্ৰিকেটত বংগ আৰু সৌৰাষ্ট্ৰৰ হৈ খেলিছিল। ইংলেণ্ডত নটিংহামশ্বাৰ আৰু ৱাৰউইকশ্বাৰৰ হৈ কাউন্টি ক্ৰিকেট খেলিছিল। মুঠতে প্ৰথম শ্ৰেণীৰ ক্ৰিকেটত তেওঁৰ ৮৯৮টা উইকেট আছে।

ভাৰতৰ সৰ্বকালৰ অন্যতম শ্ৰেষ্ঠ স্পিনাৰ অনিল কুম্বলেই তেওঁৰ মৃত্যুত শোক প্ৰকাশ কৰিছে। এক্স হেণ্ডেলত কুম্বলেই লিখিছে, “দিলীপ ভাইৰ মৃত্যুৰ খবৰটো হৃদয়বিদাৰক। ভগৱানে তেওঁৰ পৰিয়াল আৰু নিকট আত্মীয়ক শক্তি দিয়ক।” মৃত্যুৰ সময়ত দোশীয়ে পত্নী কালিন্দি, পুত্ৰ নয়ন আৰু কন্যা বিশাখাক এৰি থৈ যায়।

যোৱা মাহত দোশীয়ে লণ্ডনত অষ্ট্ৰেলিয়া আৰু দক্ষিণ আফ্ৰিকাৰ মাজত অনুষ্ঠিত হোৱা বিশ্ব টেষ্ট চেম্পিয়নশ্বিপৰ ফাইনেলো চাইছিল। ভাৰতীয় ক্ৰিকেট ব’ৰ্ডৰ বাৰ্ষিক বঁটা প্ৰদান অনুষ্ঠানতো তেওঁ উপস্থিত আছিল।

স্বাভিমানী দোশীয়ে ক্ৰিকেটক নীৰৱে বিদায় দিলে। সেই সময়ত ভাৰতীয় ক্ৰিকেট চলোৱাৰ ধৰণ-কৰণত দোশীয়ে একমত হ’ব পৰা নাছিল। তেওঁৰ পুত্ৰ নয়নো ক্ৰিকেটাৰ। তেওঁ ৰয়েল চেলেঞ্জাৰ্ছ বেংগালুৰু আৰু ৰাজস্থান ৰয়েলছৰ হৈ আই পি এলত খেলিছে। নয়নে ভাৰতৰ সৌৰাষ্ট্ৰৰ হৈ আৰু ইংলেণ্ডৰ ডাৰ্বিশ্বাইৰ আৰু ছাৰেৰ হৈও খেলিছে।