ৰাম প্ৰসাদ শৰ্মাই অসমত তৃণমূল কংগ্ৰেছৰ নেতৃত্ব ল’বলৈ আগবঢ়া বুলি খবৰ ওলাইছিল যদিও এতিয়া সুৰ সলাইছে বিজেপিৰ টিকেট-বঞ্চিত সাংসদজনে।
২৫ মে’ত শৰ্মাই তৃণমূল কংগ্ৰেছত যোগ দিয়াৰ কথা আছিল যদিও নিৰংকুশ সংখ্যাগৰিষ্ঠতাৰে পুনৰ মোদী চৰকাৰ অহাৰ পাছত এতিয়া ৰি-এক্তিভে’ট হোৱাৰ কথা জনাইছে শৰ্মাই।
অসমৰ ৰাইজে তেওঁক ‘সক্ৰিয়’ ৰাজনীতিত দেখা পাব বুলি উল্লেখ কৰি শৰ্মাই জনাই যে ’২১ত তেওঁৰ বিধান সভা খেলাৰ মন।
’২০২১ ত ৰাইজে বিচাৰিলে হ’ব। যিহেতু মোৰ ঘৰ তেজপুৰতে গতিকে তেজপুৰতে পাব।‘ কোনটো দলৰ পৰা তেওঁ ২০২১ চনত প্ৰাৰ্থিত্ব আগবঢ়াব খোজে সেই কথা এতিয়াও সিদ্ধান্ত গ্ৰহণ কৰা নাই বুলি উল্লেখ কৰি শৰ্মাই আমাৰ জনায়।
তৃণমূলত যোগদানৰ কথা অৱশ্যে শৰ্মাই অস্বীকাৰ কৰিছে।
‘নাই, এতিয়া যোগদান কৰাৰ কথা নাই। তেওঁলোকে প্ৰস্তাৱ দিছিল কিন্তু এতিয়ালৈকে মই সিদ্ধান্ত গ্ৰহণ কৰা নাই আৰু যোগদানো কৰা নাই।‘ সৌ সিদিনা তৃণমূল কংগ্ৰেছত যোগদান কৰাৰ কথা কোৱা আৰ পি শৰ্মাই বৃহস্পতিবাৰে নৰ্থ ইষ্ট নাও-ক জনায়।
মোদী চৰকাৰক লৈ তেওঁ কয়, ‘ৰাজ্যৰ কথা মই নকওঁ, কেন্দ্ৰত বিজেপি চৰকাৰ অহাটো অনিবাৰ্য্য আছিল। সন্ত্ৰাসবাদ, নক্সালবাদ নিৰ্মূল, কাশ্মীৰ ইছ্যু আৰু বিশ্বত ভাৰতমাতাক প্ৰতিষ্ঠা কৰা ইত্যাদিৰ বাবে নৰেন্দ্ৰ মোদীৰ চৰকাৰ অতিকৈ প্ৰয়োজনীয়।‘
ইয়াৰোপৰি তেওঁ কয় ‘ৰাজ্য চৰকাৰ কাৰ হয় সেইটো মিনিংলেচ, কোনো মতলব নাই। ৰাষ্ট্ৰৰ স্বাৰ্থত কেন্দ্ৰত বিজেপি চৰকাৰ হোৱাটো দৰকাৰ।‘
সদ্যসমাপ্ত লোকসভা নিৰ্বাচনত তেজপুৰ সমষ্টিত আৰ পি শৰ্মাৰ সলনি পল্লৱ লোচন দাসক দলীয় প্ৰাৰ্থিত্ব প্ৰদান কৰিছিল বিজেপিয়ে।
