আই চি চিৰ দশকটোৰ শ্ৰেষ্ঠ টেষ্ট, এদিনীয়া আৰু টি-২০ দলত এগৰাকীয়ো পাকিস্তানী ক্ৰিকেটাৰে স্থান লাভ কৰিবলৈ সক্ষম নোহোৱাৰ পাছতে আই চি চিক কঠোৰ সমালোচনা কৰিছে পাকিস্তানৰ প্ৰাক্তন ক্ৰিকেটাৰ সকলে।
আই চি চিয়ে শেহতীয়াভাৱে দশকটোৰ শ্ৰেষ্ঠ টেষ্ট, এদিনীয়া আৰু টি-২০ দল তিনিটা ঘোষণা কৰে য’ত ভাৰত, ইংলেণ্ড, অষ্ট্ৰেলিয়া, বাংলাদেশ, দক্ষিণ আফ্ৰিকা, আফগানিস্তান আৰু নিউজিলেণ্ডৰ ক্ৰিকেটাৰ সকলৰ নাম অন্তৰ্ভূক্ত হৈছিল।
প্ৰাক্তন পাকিস্তানী বলাৰ ছোৱেইব আখতাৰে খং কৰি কয় ‘আই চি চিয়ে পাকিস্তানী টি-২০ ক্ৰিকেট খেলে বুলিও পাহৰি গৈছে।’’
বৰ্তমান টি-২০ বিশ্ব ৰেংকিঙৰ দ্বিতীয় স্থানৰ বেটছমেন বাবৰ আজমৰ নাম আই চি চিৰ দশকটোৰ শ্ৰেষ্ঠ টি-২০ দলত অন্তৰ্ভূক্ত নোহোৱা বাবে আখতাৰে ক্ষোভ ব্যক্ত কৰে।
আন এগৰাকী প্ৰাক্তন পাকিস্তানী ক্ৰিকেটাৰ ৰছিদ লতিফেও আই চি চিয়ে এগৰাকী পাকিস্তানী ক্ৰিকেটাৰক দশকটোৰ শ্ৰেষ্ঠ এটাও দলত স্থান নিদিয়াত ক্ষোভ প্ৰকাশ কৰে।
‘‘টাইপিঙৰ ভুল……আই চি চিয়ে দশকটোৰ শ্ৰেষ্ঠ আই পি এল-টি-২০ বুলি লিখিবলৈ পাহৰি গ’ল,’’ আই চি চিক সমালোচনা কৰি লতিফে এইদৰে কয়।
