নতুন সংসদ ভৱন উদ্বোধনৰ চাৰিদিন পিছত ২ জুনত প্ৰাক্তন ৰাষ্ট্ৰপতি ৰামনাথ কোবিন্দক দুজন ব্যক্তিয়ে সাক্ষাৎ কৰিছিল। তেওঁলোক আছিল কেন্দ্ৰীয় গৃহমন্ত্ৰী অমিত শ্বাহ আৰু প্ৰধানমন্ত্ৰী নৰেন্দ্ৰ মোডীৰ প্ৰধান সচিব ড° পি কে মিশ্ৰ।
সেই বৈঠকতে আপাত দৃষ্টিত কোবিন্দৰ নেতৃত্বত বহু বিতৰ্কিত ‘এক দেশ, এক নিৰ্বাচন’ আঁচনিৰ বাবে কুচকাৱাজ আৰম্ভ হোৱা বুলি এই কাৰ্য কৌশলৰ বিষয়ে অৱগত সূত্ৰই জনায়। এই কথা দ্য নিউ ইণ্ডিয়া এক্সপ্ৰেছৰ এক প্ৰতিবেদনত প্ৰকাশ পাইছে।
এই সকলোবোৰ আৰম্ভ হৈছিল কৰ্ণাটকৰ নিৰ্বাচনত বিজেপিৰ পৰাজয়ৰ পিছত। ই সঁচাকৈয়ে দলটোক আঘাত দিছিল আৰু ২০২৪ চনৰ লোকসভা নিৰ্বাচনৰ সংখ্যাক লৈ ক্ৰমান্বয়ে চিন্তিত কৰি তুলিছিল। সেয়েহে একেলগে নিৰ্বাচনৰ এই ৰণকৌশল।
লগতে পঢ়ক: মুখ্যমন্ত্ৰীৰ কাম-কাজৰ শৈলীক লৈ ৰাজ্যৰ নেতাসকলৰ প্ৰশ্নৰ মাজতে হিমন্তক পাঠ দিলে কেন্দ্ৰীয় নেতৃত্বই!
কিন্তু কোবিন্দৰ ওপৰতে এই দায়িত্ব কিয়? সূত্ৰসমূহে জনোৱা মতে, প্ৰাক্তন ৰাষ্ট্ৰপতিগৰাকীয়ে সাধাৰণ জীৱন যাত্ৰা অনুসৰণ কৰে যদিও জটিল আইনী বিষয়সমূহ চম্ভালিবলৈ সক্ষম। তদুপৰি তেওঁক মোডীয়ে বিশ্বাস কৰে।
সূত্ৰৰ মতে, ‘মোদীয়ে নিজৰ বিশ্বাসযোগ্য দলৰ কাৰ্যকৰ্তাসকলক মনে মনে একেলগে নিৰ্বাচনৰ বাবে ভেটি প্ৰস্তুত কৰিবলৈ কয় যাতে ২০২৪ চনৰ নিৰ্বাচনৰ পূৰ্বে বিৰোধীৰ একত্ৰীকৰণ শিথিল হয়।
শুকুৰবাৰে কোবিন্দক আনুষ্ঠানিকভাৱে ‘এক দেশ, এক নিৰ্বাচন’ পেনেলৰ মুৰব্বী হিচাপে নিযুক্তি দিয়া হয়। পিছদিনা ইয়াৰ সদস্যসকলৰ নাম ঘোষণা কৰা হয়। দেওবাৰে কেন্দ্ৰীয় আইন মন্ত্ৰালয়ৰ বিষয়াসকলে পেনেলৰ প্ৰস্তুতিমূলক কামৰ বাবে আনুষ্ঠানিকভাৱে কোবিন্দক সাক্ষাৎ কৰে।
কিন্তু যোৱা ২ জুনতে বিষয়টো উত্থাপন হোৱাৰ পিছৰে পৰা প্ৰাক্তন ৰাষ্ট্ৰপতিগৰাকীয়ে প্ৰস্তুতিৰ কাম আৰম্ভ কৰা যেন দেখা গৈছে ।
তেওঁৰ ছ’চিয়েল মিডিয়াৰ টাইমলাইনত অলপ চকু ফুৰালেই বুজা যায় যে তেওঁ কেনেকৈ ভেটি প্ৰস্তুত কৰিছিল। যোৱা তিনিমাহৰ ভিতৰত তেওঁ কমেও ১০ জন গৱৰ্ণৰক সাক্ষাৎ কৰিছিল। অৱসৰপ্ৰাপ্ত ৰাষ্ট্ৰপতিসকলৰ ব্যস্ত ভ্ৰমণসূচী নাথাকে। সাধাৰণতে তেওঁলোকে অৱসৰৰ বছৰবোৰ উপভোগ কৰে, হয়তো এখন বা দুখন স্মৃতিকথাৰ গ্ৰন্থ লিখে। ইয়াৰ বিপৰীতে কোবিন্দে ৰাজভৱনসমূত ঘূৰি ফুৰি ৰাজ্যপাল আৰু দলৰ নেতাক আতিথ্য দিবলৈ আৰম্ভ কৰিলে।
লগতে পঢ়ক: শিক্ষক দিৱস: দাৰ্শনিক সৰ্বপল্লী ৰাধাকৃষ্ণণৰ জীৱন আৰু আদৰ্শ
৯ জুনৰ পৰা ২৯ আগষ্টৰ ভিতৰত তেওঁ দলৰ জ্যেষ্ঠ নেতা আৰু আৰ এছ এছৰ মুৰব্বীৰ উপৰিও কমেও ১০ জন গৱৰ্ণৰ/প্ৰশাসকক সাক্ষাৎ কৰিছিল। ইয়াৰে কিছুমানক এবাৰতকৈ অধিকবাৰ সাক্ষাৎ কৰিছিল (টাইমলাইন চাওক)।
চৰকাৰে পেনেলৰ নিযুক্তি আনুষ্ঠানিক কৰাৰ লগে লগে ইতিমধ্যে একেলগে নিৰ্বাচনৰ বাবে নিজৰ প্ৰস্তাৱসমূহ দৃঢ় কৰাৰ কাম আৰম্ভ কৰিছে। আনকি ১৮ ছেপ্টেম্বৰৰ পৰা ২২ ছেপ্টেম্বৰলৈ সংসদৰ পাঁচদিনীয়া বিশেষ অধিৱেশনৰ সময়তো ইয়াৰ প্ৰতিবেদন দাখিল কৰিব পৰা যাব।
খচৰাখনৰ আঁৰৰ চিন্তাধাৰাটো হ’ল ২০২৫ চনৰ আশে-পাশে যিবোৰ বিধানসভাৰ কাৰ্যকাল শেষ হ’ব (যেনে মহাৰাষ্ট্ৰ, পশ্চিম বংগৰ দৰে ) সেইবোৰ ভংগ হ’ব। আনহাতে, শেহতীয়াকৈ নিৰ্বাচনলৈ যোৱা ৰাজ্য যেনে কৰ্ণাটক আৰু হিমাচল প্ৰদেশৰ কাৰ্যকাল এবছৰৰ বৃদ্ধি পাব যাতে… তাত পৰৱৰ্তী চক্ৰত, অৰ্থাৎ ২০২৯ চনত একেলগে নিৰ্বাচন অনুষ্ঠিত হ’ব পাৰে।
এজন জ্যেষ্ঠ নেতাই কয় যে লোকসভা আৰু বিধানসভাৰ নিৰ্বাচন একেলগে অনুষ্ঠিত কৰিলে বিৰোধী জোঁট ইণ্ডিয়াত বিভ্ৰান্তিৰ সৃষ্টি কৰিব পাৰে।
লগতে পঢ়ক: Teachers Day 2023 : শিক্ষক দিৱসৰ লগত সংগতি থকা কেইটামান বহুবিকল্পী প্ৰশ্ন
সূত্ৰসমূহৰ মতে, ‘পশ্চিম বংগত তৃণমূল কংগ্ৰেছৰ মুৰব্বী মমতা বেনাৰ্জী, কংগ্ৰেছ আৰু বাওঁপন্থী দলসমূহে বিধানসভা আৰু লোকসভা নিৰ্বাচন দুয়োটাৰে বাবে মিত্ৰতাত আৱদ্ধ হোৱাটো কঠিন হ’ব, কিয়নো প্ৰতিটো দলে প্ৰথমে নিজৰ স্থানীয় স্বাৰ্থ ৰক্ষা কৰিব বিচাৰিব। দিল্লী আৰু পঞ্জাৱ আৰু অন্যান্য ঠাইত আপ আৰু কংগ্ৰেছৰ মাজতো একেধৰণৰ সমস্যাৰ সৃষ্টি হ’ব। কংগ্ৰেছৰ লগত থকা আঞ্চলিক দলসমূহে সংঘাতত লিপ্ত হ’ব, আৰু এইটোৱে গেৰুৱা দলটোক অধিক সুযোগ দিব বুলি বিজেপিয়ে আশা কৰিছে।’
