অসম জাতীয় পৰিষদত যোগদান কৰিলে অসম বিধানসভাৰ প্ৰাক্তন অধ্যক্ষ তথা আঞ্চলিকতাবাদী নেতা পুলকেশ বৰুৱাই।
বৃহস্পতিবাৰে অসম জাতীয় পৰিষদৰ মুখ্য কাৰ্যালয়ত বৰুৱাৰ লগতে প্ৰাক্তন অগপ বিধায়ক অনুপ ফুকন, অসম আন্দোলনৰ সময়ৰ নেতা বিপুল দাসকে ধৰি প্ৰায় ৩০ গৰাকী ব্যক্তিয়ে একেলগে এজেপিত যোগদান কৰে ।
যোগদান কৰি বৰুৱাই অগপৰ বিৰুদ্ধে সৰৱ হৈ সংবাদ মাধ্যমৰ আগত কয়, ‘অসমত আঞ্চলিকতাবাদৰ প্ৰাসংগিকতা আছিল আৰু থাকিব। অসম গণ পৰিষদ ভাৰতীয় জনতা পাৰ্টীৰ পেটত সোমাই পৰিছে। তেওঁলোকে নিজৰ অস্তিত্ব ৰক্ষা কৰিবলৈ কোনো ব্যৱস্থা গ্ৰহণ কৰিব পৰা নাই।‘
তেওঁ লগতে কয়, ‘এইটো প্ৰমাণিত হৈছে কাৰণ জাতিধ্বংসী ‘কা’ৰ বিৰোধিতা কৰাত ব্যৰ্থ হৈছে অগপ। সেয়েহে অসমীয়া খিলঞ্জীয়াৰ অস্তিত্ব ৰক্ষাতো তেওঁলোক ব্যৰ্থ হৈছে।‘
ইয়াৰোপৰি অসম জাতীয় পৰিষদে আঞ্চলিকতাবাদ ৰক্ষা কৰি খিলঞ্জীয়াৰ স্বাৰ্থ ৰক্ষাৰ খাতিৰত কাম কৰিব বুলি তেওঁ দাবী কৰাৰ লগতে এইখনেই জাতীয়তাবাদ ৰক্ষা কৰাৰ মূল মঞ্চ বুলি দাবী কৰে।
যোগদান কাৰ্যসূচীত অসম জাতীয় পৰিষদৰ মুখ্য আহ্বায়ক বসন্ত ডেকা, কৃষ্ণ গোপাল ভট্টাচাৰ্য্য, আহ্বায়ক অদীপ কুমাৰ ফুকনৰ লগতে অন্যান্য নেতৃবৰ্গও উপস্থিত থাকে।
উল্লেখ্য যে প্ৰফুল্ল মহন্তৰ প্ৰথমটো কাৰ্যকালত বিধান সভাৰ অধ্যক্ষ নিৰ্বাচিত হোৱা অগপ দলৰ জন্মলগ্নৰ নেতাগৰাকীয়ে পৰৱৰ্তী সময়ত ভৃগু ফুকন, বৃন্দাবন গোস্বামীৰ আদি নেতাৰ সৈতে নতুন অগপ দল গঠন কৰিছিল।
