ত্ৰিপুৰাৰ পূৰ্বৰ বাওঁ চৰকাৰখনৰ গড়কাপ্তানী মন্ত্ৰী বাদল চৌধুৰী আৰু বিভাগটোৰ তদানীন্তন মুখ্য অভিযন্তা সুনীল ভৌমিকক গ্ৰেপ্তাৰ কৰাৰ পিছত প্ৰাক্তন মুখ্য সচিব য়শপাল সিঙো গ্ৰেপ্তাৰ হোৱাৰ সম্ভাৱনাই দেখা দিছে।
প্ৰায় ৬০০ কোটি টকাৰ দুৰ্নীতিটোৰ এজন অভিযুক্ত হিচাপে সিঙৰ বিৰুদ্ধে ইতিপূৰ্বে ৱাৰেণ্ট জাৰি কৰা হৈছে।
ভূতপূৰ্ব মন্ত্ৰী বাদল চৌধুৰীক ২১ অক্টোবৰত এখন চিকিৎসালয়ত চিকিৎসাধীন অৱস্থাত গ্ৰেপ্তাৰ কৰিছিল আৰক্ষীয়ে আৰু তেওঁৰ চিকিৎসা আৰক্ষীৰ নিৰীক্ষণত চলি আছে। চৌধুৰীৰ আগতীয়া জামিন আৱেদন যোৱা ১৬ অক্টোবৰত এখন স্থানীয় আদালতে নাকচ কৰিছিল।
চিকিৎসালয় কৰ্তৃপক্ষই জনোৱা মতে উচ্চ ৰক্তচাপত ভোগা প্ৰাক্তন মন্ত্ৰীজনৰ স্বাস্থ্যৰ অৱস্থা সংকটজনক।
প্ৰাক্তন মুখ্য মন্ত্ৰী মানিক সৰকাৰ, চি পি আই (এম) ৰাজ্যিক কমিটীৰ সভাপতি গৌতম দাসে চৌধুৰীক ২১ অক্টোবৰত চিকিৎসালয়ত সাক্ষাৎ কৰিছিল।
লগতে পঢ়ক ত্ৰিপুৰাত প্ৰাক্তন গড়কাপ্তানী মন্ত্ৰীৰ বিৰুদ্ধে গোচৰ ৰুজু
নিজৰ কাৰ্য্যকালত বিভাগটোত ব্যাপক দুৰ্নীতিৰ অভিযোগ উঠাৰ পিছত চৌধুৰীয়ে কৈছিল যে তেওঁ যিকোনো ধৰণৰ তদন্তৰ সন্মুখীন হ’বলৈ সাজু।
গড়কাপ্তানী বিভাগৰ প্ৰাথমিক পৰ্য্যৱক্ষণ আৰু তাৰ পৰৱৰ্তী অনুসন্ধানৰ ভিত্তিত চৌধুৰী, প্ৰাক্তন মুখ্য সচিব আৰু বিভাগটোৰ তদানীন্তন মুখ্য অভিযন্তাৰ বিৰুদ্ধে ভাৰতীয় দণ্ডবিধিৰ ধাৰা 409, 418, 420, 201, 120B আৰু দুৰ্নীতি প্ৰতিৰোধ আইনৰ ধাৰ 13-ৰ অধীনত গোচৰটো ৰুজু কৰা হৈছে।
