মুখ্য মন্ত্ৰী সৰ্বানন্দ সোণোৱালে সোমবাৰে তেওঁৰ ডিব্ৰুগড় চহৰৰ লখিনগৰত থকা বাসভৱনলৈ যোৱা পথচোৱাৰ আধাৰশিলা স্থাপন কৰিছে।
১২৮.৬৮ লাখ টকা ব্যয়সাপেক্ষে নিৰ্মান হ’বলগীয়া ১.০২৫ কি:মি: দৈৰ্ঘৰ এই পথচোৱাই ১নং লখিনগৰ পথ, উপপথ-৩ আৰু কচাৰীবাৰী পথটো সামৰি লৈছে।
উল্লেখ্য যে মুখ্য মন্ত্ৰীৰ বাসগৃহ ১নং লখিনগৰৰ আৰম্ভণিতে থকা সত্তেও বাৰিষা কালত এই কেঁচা পথটোৰ অৱস্থা অবৰ্ণনীয় হৈ পৰে।
কেইমাহমান পূৰ্বে কেইগৰাকীমান স্থানীয় সচেতন ব্যক্তিয়ে মুখ্য মন্ত্ৰীয়ে নিজৰ বাসগৃহৰ পথটো নিৰ্মাণত ব্যৰ্থ হোৱা বাবে চোকা সমালোচনা কৰিছিল।
ছচিয়েল মেডিয়াত এই বিষয়টো উত্থাপন কৰি চৰকাৰৰ দ্বাৰা পথচোৱা নিৰ্মাণৰ সিদ্ধান্তক আদৰণি জনাইছে স্থানীয় বাসিন্দা গোবিন্দ চাংমায়ে।
ৰাজ্যিক গড়কাপ্তানি মন্ত্ৰী হিমন্ত বিশ্ব শৰ্মা, ডিব্ৰুগড়ৰ সাংসদ ৰামেশ্বৰ তেলী, চাবুৱাৰ বিধায়ক বিনোদ হাজৰিকা আৰু লাহোৱালৰ বিধায়ক ঋতুপৰ্ণ বৰুৱা আধাৰশিলা স্থাপন অনুষ্ঠানত উপস্থিত আছিল।
