দ্বিতীয় পৰ্য্যায়ৰ ভোটগ্ৰহণৰ সময়ত বিসংগতি ধৰা পৰা কৰিমগঞ্জ লোকসভা সমষ্টিৰ চাৰিটা ভোটকেন্দ্ৰত আজি পুনৰ ভোটগ্ৰহণ অনুষ্ঠিত কৰা হ’ব। এই কথা জনাইছে ৰাজ্যিক নিৰ্বাচন আয়োগে।
বিসংগতি হোৱাটো নিশ্চিত হোৱাৰ পিছতে নিৰ্বাচন আয়োগে ১৮ এপ্ৰিলৰ দিনা ভোটকেন্দ্ৰকেইটাত ভোটগ্ৰহণ প্ৰক্ৰিয়া বন্ধ কৰি দিছিল।
আজি পুনৰ ভোটগ্ৰহণ অনুষ্ঠিত হ’ব লগীয়া ভোটকেন্দ্ৰ চাৰিটা হৈছে দক্ষিণ কৰিমগঞ্জ বিধানসভা সমষ্টিৰ অন্তৰ্গত ক্ৰমে ১০৫নং বাটইয়া, ১৩৪ নং গন্ধৰ্ভখনি, ১৫২নং আৰু ১৫৩নং আতানগৰ প্ৰাথমিক বিদ্যালয়ৰ কেন্দ্ৰ।
কালি ২৩ এপ্ৰিলত তৃতীয় পৰ্য্যায়ৰ ভোটগ্ৰহণ অন্ত পৰাৰ লগে লগে ৰাজ্যত আৰু লগতে সমগ্ৰ উত্তৰ-পূবতে ভোটগ্ৰহণ প্ৰক্ৰিয়াটোৰ নিয়মমতে অন্ত পৰিছিল যদিও বিসংগতিৰ বাবে ভোটগ্ৰহণ কৰিব নোৱৰা কেন্দ্ৰকেইটাত পুনৰ ভোটগ্ৰহণ হ’ব।
জানিব পৰামতে, আজি পুৱাৰ পৰাই কেন্দ্ৰ চাৰিটাত পুনৰ ভোটগ্ৰহণ প্ৰক্ৰিয়া আৰম্ভ হৈছে। আবেলি ৫ বজালৈকে এই ভোটগ্ৰহণ চলিব।
ইপিনে ডিফুৰো এটা ভোটকেন্দ্ৰত আজি পুনৰ ভোটগ্ৰহণ অনুষ্ঠিত হ’ব। দ্বিতীয় পৰ্য্যায়ত ভোটগ্ৰহণ হোৱা স্বায়ত্ত শাসিত জিলা সমষ্টিটোৰ অন্তৰ্গত ভোটকেন্দ্ৰটোত বিসংগতিৰ বাবে ভোটগ্ৰহণ বন্ধ ৰখা হৈছিল।
