প্ৰচণ্ড বৰষুণৰ লগতে ধুমুহা বতাহ। ব’হাগতে বিপৰ্যস্ত ৰাজধানী দিল্লী আৰু ৰাজধানীৰ আশে-পাশে থকা অঞ্চলসমূহ। যোৱা ২৪ ঘন্টাত দিল্লী-এনচিআৰত বতৰৰ দুৰ্যোগৰ বাবে ৪জন লোকে প্ৰাণ হেৰুৱাইছে। বিমান আৰু ৰে’লসেৱাত ব্যাঘাত জন্মিছে। বানপানীৰ বাবে বহু পথ প্ৰায় বন্ধ হৈ আছে।
শুকুৰবাৰে পুৱাই ৰাজধানীত ধুমুহা বতাহ বলিবলৈ আৰম্ভ কৰে। যিটোৱে পিছলৈ প্ৰায় ঘূৰ্ণীবতাহৰ ৰূপ লয়। প্ৰগতি ময়দান অঞ্চলত পুৱা ধুমুহাৰ সৰ্বোচ্চ গতিবেগ আছিল প্ৰতি ঘণ্টাত ৭৮ কিলোমিটাৰ। আন অঞ্চলতো মুষলধাৰে বৰষুণ দি আছে।
দিল্লীৰ দ্বাৰকাত প্ৰচণ্ড বতাহত এটা ঘৰ ভাঙি পৰে। ঘৰৰ ভিতৰত তিনিটা শিশু আৰু এগৰাকী মহিলা আছিল। চাৰিওজন লোকৰে মৃত্যু হয়। বৰষুণৰ ফলত বহু ৰাস্তা-ঘাট জলমগ্ন হৈ পৰিছে।
ধাৰাসাৰ বৰষুণৰ ফলত লাজপত নগৰ, আৰ কে পুৰম আৰু দ্বাৰকাত পানী জমা হৈছে। ফলত বাছ আৰু অটো চলা নাই। বহু ঠাইত ৰে’ল লাইনতো পানী জমা হৈছে। ফলত ৰে’লসেৱা আংশিকভাৱে বন্ধ হৈ পৰিছে।
অৱশ্যে বিমান সেৱাই আটাইতকৈ বেছি ক্ষতিগ্ৰস্ত হৈছে। দিল্লী বিমানবন্দৰৰ টাৰ্মিনেল ৩-ত এটা লোহাৰ নিৰ্মাণ ভাঙি পৰে। বিমানবন্দৰৰ বিভিন্ন ঠাইত জমা হৈছে পানী। যাৰ বাবে আজি ৮০-১০০ খন বিমান দেৰিকৈ চলি আছে। দিল্লী অভিমুখী ৪০খন বিমান ডাইভাৰ্ট কৰা হৈছে।
অৱশ্যে বতৰ বিজ্ঞান বিভাগে ইতিমধ্যে এনে হ’ব পাৰে বুলি ভৱিষ্যদ্বাণী কৰিছিল। ইতিমধ্যে দিল্লীত ৰেড এলাৰ্ট জাৰি কৰা হৈছিল। বিমান যাত্ৰীসকলকো আগতীয়াকৈ সকীয়াই দিয়া হৈছিল। বিমান সংস্থাসমূহৰ ৱেবছাইটসমূহৰ ওপৰত চকু ৰাখিবলৈও অনুৰোধ কৰা হৈছিল।
