ৰাজ্যসভালৈ মনোনীত হৈছে চাৰিগৰাকী প্ৰখ্যাত ভাৰতীয়৷ এইবাৰ ৰাজ্যসভাৰ ট্ৰেকত দৌৰিব এথলীট পিটি উষা। ৰাষ্ট্ৰপতিয়ে মনোনীত কৰা সদস্য হিচাপে সংসদৰ উচ্চ সদনলৈ মনোনীত কৰা হৈছে সৰ্বকালৰ অন্যতম শ্ৰেষ্ঠ স্প্ৰিণ্টাৰক। ৰাজ্যসভালৈ মনোনীত হৈছে কিংবদন্তি সংগীত পৰিচালক ইল্লাইয়াৰাজাও।
লগতে সমাজ কৰ্মী বীৰেন্দ্ৰ হেগড়ে আৰু চিত্ৰনাট্যকাৰ তথা পৰিচালক বি বিজয়েন্দ্ৰকো ৰাজ্যসভালৈ মনোনীত কৰা হৈছে।
১৯৮৪ চনৰ লছ এঞ্জেলছ অলিম্পিকত ১ নেন’ ছেকেণ্ডৰ ব্যৱধানৰ কাৰনে পদক লাভৰ পৰা বঞ্চিত হৈছিল উষা। অলিম্পিক পদক লাভ নকৰিলেও বিভিন্ন আন্তঃৰাষ্ট্ৰীয় প্ৰতিযোগিতাত পিটি উষাৰ সফলতা সন্দেহহীন।
সেই সফলতাৰ স্বীকৃতি স্বৰূপেই এইবাৰ ৰাজ্যসভালৈ গৈ আছে ঊষা। প্ৰধানমন্ত্ৰী নৰেন্দ্ৰ মোদীয়েও তেওঁক টুইটযোগে অভিনন্দন জনাইছে।
ইল্লাইয়াৰাজা দক্ষিণৰ এগৰাকী প্ৰখ্যাত সংগীত পৰিচালক। তেখেতে দক্ষিণৰ বহুত বিখ্যাত ছবিত সুৰ ৰচনা কৰিছে। সদমা, পা, চিনি কম আদি বলীউডৰ ছবিতো সুৰ ৰচনা কৰিছে ৰাজাই। কেন্দ্ৰই ৰাজ্যসভালৈ প্ৰেৰণ কৰিছে পৰিচালকজনক। সামাজিক কৰ্মী বীৰেন্দ্ৰ হেগড়ে আৰু চিত্ৰনাট্যকাৰ তথা পৰিচালক বি বিজয়েন্দ্ৰেও ৰাজ্যসভালৈ যাব। চাৰিওজনকে টুইটযোগে অভিনন্দন জনায় প্ৰধানমন্ত্ৰী নৰেন্দ্ৰ মোদীয়ে।
তাৎপৰ্যপূৰ্ণভাৱে বিজেপি চৰকাৰে ৰাষ্ট্ৰপতি পদৰ প্ৰাৰ্থী হিচাপে ৰাজ্যসভালৈ প্ৰেৰণ কৰা চাৰিওগৰাকী দক্ষিণ ভাৰতৰ। সমালোচকসকলে কয় যে বিজেপিয়ে ৰাজ্যসভাৰ প্ৰাৰ্থী নিৰ্বাচনৰ বাবেও সূক্ষ্ম ৰাজনৈতিক পৰিকল্পনা কৰিছে। উত্তৰ, পশ্চিম আৰু পূব ভাৰতৰ অধিকাংশ অঞ্চল দখল কৰাৰ পিছত এইবাৰ বিজেপিৰ লক্ষ্য হৈছে দক্ষিণ ভাৰত। সেইবাবেই দক্ষিণৰ ব্যক্তিত্বক অধিক গুৰুত্ব দিয়া হৈছে।
