আজিও ন্যায়ৰ অপেক্ষাত ২০১১ৰ ভূমিস্বত্ব আন্দোলনৰ চাৰি চহিদৰ পৰিয়াল
সুদীৰ্ঘ ৯ বছৰৰ পিচটো ন্যায় নাপালে ২২জুন ২০১১-ৰ চাৰিগৰাকী শ্বহীদ ক্ৰমে ৰাহুল আলী, বীৰেন কলিতা, শিৱ কুমাৰ চৌহান আৰু জেৰিনা বেগমৰ পৰিয়ালে।
চাৰি গৰাকী চহিদক স্মৰণ কৰি ভূমিস্বত্ব অধিকাৰৰ বিষয়টো সন্দৰ্ভত সোণোৱাল চৰকাৰৰ স্থিতি সম্পৰ্কে শ্বেতপত্ৰ প্ৰকাশৰ দাবী তোলে বৃহত্তৰ গুৱাহাটী উন্নয়ন সমিতি সমূহৰ ঐক্য মঞ্চৰ ।
২০১১ চনৰ ২২ জুনত নিজৰ ভূমিস্বত্ব অধিকাৰ সাব্যস্ত কৰিবলৈ গুৱাহাটী বাসী ৰাইজে লোৱা দিচপুৰ ঘেৰাও কাৰ্য্যসূচীত যোগদান কৰিব আহি মৃত্যুক আকোৱালি লোৱা ৰাহুল আলী, বীৰেন কলিতা, শিৱ কুমাৰ চৌহান আৰু জেৰিনা বেগমক চহিদ ঘোষণা কৰিছিল সংগঠনটোৱে।
আজি গুৱাহাটী প্ৰেছ ক্লাৱত এক অনুষ্ঠানত চহিদ সকলক শ্ৰদ্ধাঞ্জলি জ্ঞাপন কৰে বৃহত্তৰ গুৱাহাটী উন্নয়ন সমিতি সমূহৰ ঐক্য মঞ্চই ।
অনুষ্ঠানত এগৰাকী চহিদৰ পিতৃ আৰু তেখেতৰ পত্নী উপস্থিত থাকি গুৱাহাটীবাসী ৰাইজৰ ভূমিস্বত্ব অধিকাৰ বিষয়টো চৰকাৰে গুৰুত্বসহকাৰে নোলোৱাত গভীৰ আক্ষেপ প্ৰকাশ কৰে ।
মঞ্চৰ সভাপতি অমৰজ্যোতি বেজবৰুৱাই কয় ‘গুৱাহাটীবাসী ৰাইজৰ ভূমিস্বত্ব অধিকাৰৰ বিষয়টো কোনো চৰকাৰে আজিলৈ গুৰুত্ব সহকাৰে নলোৱাৰ বাবে এই বিষয়টোৱে এক গুৰুতৰ সমস্যাৰ ৰূপ লৈছে ।
‘চৰকাৰে সময়ে সময়ে যি ধৰণৰ উচ্ছেদৰ কাৰ্য্যসূচী হাতত লৈ গুৱাহাটীৰ বিভিন্ন ঠাইত অবৈজ্ঞানিক আৰু যথোচিত সু পৰিকল্পনা বিহীন ভাবে কাম কৰি আছে ই মানুহৰ মাজত বিভ্ৰান্তিৰ সৃষ্টি কৰিছে’ বেজবৰুৱাই লগতে কয় ।
অনুষ্ঠানত বিশিষ্ট সমাজকৰ্মী অদীপ ফুকন আৰু জ্যেষ্ঠ অধিবক্তা শান্তনু বৰঠাকুৰ উপস্থিত থাকে ।