ইংলেণ্ডৰ প্ৰাক্তন ৰয়েল মেৰিন কমাণ্ডাৰ মিচেল হাচক্ৰাফ্টে গঢ়ি তুলিছে এক অভূতপূৰ্ব নজিৰ। ইংলিচ চেনেলৰ পৰা যাত্ৰা আৰম্ভ কৰি এভাৰেষ্টৰ শিখৰত অভিযানৰ অন্ত পেলায় তেওঁ। তেওঁৰ এই অভিযানত মুঠ ৮ মাহ সময় লাগিছিল। সেই সময়ছোৱাত তেওঁ প্ৰায় ১৩,০০০ কিলোমিটাৰ পানী, স্থল, পৰ্বত আদি অতিক্ৰম কৰিছে।
৩২ বছৰীয়া মিচেলে যোৱা বছৰৰ ১৪ ছেপ্টেম্বৰৰ পৰা নিজৰ অভিযান আৰম্ভ কৰিছিল। অভিযানৰ আৰম্ভণিতে তেওঁ ৩৪ কিলোমিটাৰ দৈৰ্ঘ্যৰ ইংৰাজী চেনেল সাঁতুৰি পাৰ হয় । তাৰ পিছত তেওঁ ফ্ৰান্সৰ পৰা ১১,৯২৯ কিলোমিটাৰ চাইকেলেৰে ভাৰতলৈ গৈ পশ্চিম বংগৰ দীঘাত উপস্থিত হয়। ভাৰতৰ পৰা ৯০০ কিলোমিটাৰ চাইকেলেৰে নেপালৰ কাঠমাণ্ডুলৈ গৈ তাৰ পৰা ৩৬৫ কিলোমিটাৰ ট্ৰেকিং কৰি ১৬ এপ্ৰিলত এভাৰেষ্টৰ শিখৰত উপনীত হয়। ১৬ এপ্ৰিল দেওবাৰে নেপালৰ সময় অনুসৰি পুৱা ৭:২০ বজাত এভাৰেষ্টৰ শিখৰত ভৰি দিয়ে।
২১ বছৰ বয়সত হাচক্ৰাফ্টে ৰয়েল মেৰিনত যোগদান কৰে। ৬ বছৰ তাত সেৱা আগবঢ়োৱাৰ পিছত ২০২১ চনত অৱসৰ গ্ৰহণ কৰে। তাৰ পিছত তেওঁ এই অভিযানৰ বাবে প্ৰস্তুতি চলাবলৈ আৰম্ভ কৰে। তেওঁৰ দলটোৱে দাবী কৰে যে তেওঁ সাগৰৰ পৰা পাহাৰলৈকে আটাইতকৈ বেছি দূৰত্ব অতিক্ৰম কৰিছে।
অভিযান শেষ হোৱাৰ পিছত হাচক্ৰাফ্টে নিজৰ ছ’চিয়েল মিডিয়া একাউণ্টত লিখিছে, “মই ৮ বছৰ বয়সৰ পৰাই এভাৰেষ্টৰ শিখৰত উপনীত হোৱাৰ সপোন দেখি আহিছো।” …বছৰ বছৰ ধৰি প্ৰস্তুতিৰ অন্তত ৮ দীঘলীয়া মাহৰ তীব্ৰ শাৰীৰিক কষ্টৰ মাজতো ইংৰাজী চেনেল পাৰ হৈ গ’লোঁ। তাৰ পিছত ১৯খন দেশৰ মাজেৰে চাইকেল চলাই ৯০০ কিলোমিটাৰ দৌৰি এভাৰেষ্টৰ শিখৰত উপনীত হ’বলৈ সক্ষম হ’লোঁ৷
অভিযান সম্পূৰ্ণ কৰাৰ পিছত হাচক্ৰাফ্টে তেওঁৰ প্ৰয়াত পিতৃক স্মৰণ কৰি কয়, “মই ১১ বছৰ আগতে মোৰ দেউতাক হেৰুৱাইছিলো। কিন্তু তেওঁ এতিয়াও প্ৰতিটো খোজতে মোৰ লগত আছে। মই যি কৰিলোঁ সেয়া বৰ কঠিন আছিল। কিন্তু এই কঠিন দুঃসাহসিক অভিযান সম্পূৰ্ণ কৰি মই অতি সুখী।”
বৰ্তমান মিচেল হাচক্ৰাফ্ট ডেভনৰ টৰ্কে অঞ্চলত থাকে। এই অভিযানৰ আগতে তেওঁ কেইবাটাও অভিযানত নামিছিল। বিবিচিৰ এক প্ৰতিবেদন অনুসৰি এই অভিযানসমূহৰ ভিতৰত আটলাণ্টিক মহাসাগৰ পাৰ হৈ ৪৮০০ কিলোমিটাৰ নাওঁ চলোৱা আৰু উত্তৰ আমেৰিকাত ৫০০০ কিলোমিটাৰ চাইকেল চলাইছিল।
তেওঁৰ বৰ্তমানৰ অভিযান ‘প্ৰজেক্ট লিমিটলেছ’ সম্পূৰ্ণৰূপে তেওঁৰ প্ৰডাকচন টিমে চিত্ৰগ্ৰহণ কৰিছিল। যিজনৰ কাম শেষ হৈ এভাৰেষ্ট জয় কৰি বেছ কেম্পলৈ উভতি যায়।
বৰ্তমান তেওঁ SAVSIM নামৰ বন্যপ্ৰাণী সংৰক্ষণ সংস্থা এটাৰ ব্ৰেণ্ড এম্বেছাদৰ। এই সংস্থাটোৰ বাবে তেওঁ ধন সংগ্ৰহ কৰি আছে। সংস্থাটোৱে পোষ্ট ট্ৰমেটিক ষ্ট্ৰেছ ডিছঅৰ্ডাৰত আক্ৰান্ত প্ৰবীণ আৰু অনুৰূপ সমস্যা থকা আন লোকসকলকো মানসিক স্বাস্থ্যৰ সহায় আগবঢ়ায়।
অভিযান আৰম্ভ কৰাৰ পূৰ্বে epigram.org.uk ৰ সৈতে হোৱা এক সাক্ষাৎকাৰত তেওঁ কয় যে, “মই এজন অতি সাধাৰণ সাঁতোৰবিদ, মই এজন অতি সাধাৰণ দৌৰবিদ, এজন অতি সাধাৰণ চাইকেল আৰোহী আৰু আমি এই প্ৰকল্পটো কৰি প্ৰমাণ কৰিছো যে অবিশ্বাস্য কামবোৰ লাভ কৰিবলৈ আপুনি ছুপাৰমেন হ’ব নালাগে।”
