আজিৰ পৰা বিশ্বনাথৰ জৱাহৰলাল নৱোদয় বিদ্যালয়ত অনুষ্ঠিত হৈছে ২৯ সংখ্যক ৰাষ্ট্ৰীয় টাইকোৱাণ্ডো প্ৰতিযোগিতা। ১৯৬৬ চনৰ অৰ্জুন বঁটা প্ৰাপ্ত ভোগেশ্বৰ বৰুৱাই এক গাম্ভীৰ্যপূৰ্ণ অনুষ্ঠানৰ মাজেৰে অলিম্পক শিখা প্ৰজ্বলন কৰি ৰাষ্ট্ৰীয় পৰ্যায়ৰ প্ৰতিযোগিতাখন উদ্বোধন কৰে।
উল্লেখ্য যে অহা ২৭ অক্টোবৰলৈ চলিবলগীয়া এই ৰাষ্ট্ৰীয় পৰ্যায়ৰ টাইকোৱাণ্ডো প্ৰতিযোগিতাখনত ভাৰতৰ নৱোদয় বিদ্যালয় সমূহৰ প্ৰায় পাঁচ শতাধিক প্ৰতিযোগীয়ে অংশগ্ৰহণ কৰিছে।
শোণিতপুৰ নৱোদয় বিদ্যালয়ৰ অধ্যক্ষ কে. এম. শচীয়ে জানিবলৈ দিয়া মতে হাইদৰাবাদ, পুনে, চিলং, চণ্ডীগড়, লক্ষ্ণৌ, পাটনা, ভূপাল, জয়পুৰকে ধৰি মুঠ ৮টা মণ্ডলৰ ৪২৭ গৰাকী প্ৰতিযোগীয়ে এই ৰাষ্ট্ৰীয় টাইকোৱাণ্ডো প্ৰতিযোগিতাত অংশগ্ৰহণ কৰিছে। ইয়াৰে চিলং মণ্ডলৰ ৩৭ গৰাকী প্ৰতিযোগীৰ ভিতৰত শোণিতপুৰ নৱোদয় বিদ্যালয়ৰ ১৪ গৰাকী প্ৰতিযোগীয়ে অংশগ্ৰহণ কৰিব।
ইফালে শুভাৰম্ভণি অনুষ্ঠানৰ পাছতে মুকলি কৰা হয় এখন স্মৃতি গ্ৰন্থ। উক্ত অনুষ্ঠানত বিশ্বনাথ জিলাৰ উপায়ুক্ত ধীৰাজ জ্যোতি কলিতা সহ বহুকেইজন বিশিষ্ট ব্যক্তি উপস্থিত থাকে।
উল্লেখ যে অৰ্জুন বঁটা বিজয়ী ভোগেশ্বৰ বৰুৱাই ইংৰাজী মাধ্যমৰ বিদ্যালয়য়ে এনেদৰে আটক ধুনীয়াকৈ এখন ৰাষ্ট্ৰীয় পৰ্যায়ৰ প্ৰতিযোগিতা অনুষ্ঠিত কৰাত সকলোৰে সহায়-সহযোগিতা পোৱাতো এক শুভ বাৰ্তা বুলি সাংবাদিকৰ সৈতে হোৱা সাক্ষাৎকাৰত উল্লেখ কৰে।
