আমেৰিকা যুক্তৰাষ্ট্ৰৰ ৰাজধানী ৱাশ্বিংটনৰ ভাৰতীয় দুতাবাসৰ সন্মুখত থকা মহাত্মা গান্ধীৰ প্ৰতিমূৰ্তিত কোনো অজ্ঞাত দুৰ্বৃত্তই গ্ৰাফিটি আৰু স্প্ৰে’ পেণ্টিঙৰ জৰিয়তে নষ্ট কৰিছে।
এই সংক্ৰান্তত ইতিমধ্যে ভাৰতীয় দুতাবাসে স্থানীয় প্ৰশাসনৰ ওচৰত অভিযোগ দাখিল কৰিছে।
ঘটনাটো যোৱা ২ আৰু ৩ জুনৰ ৰাতি সংঘটিত হোৱা বুলি জানিব পৰা গৈছে।
বুধবাৰে ৱাশ্বিংটন মেট্ৰ’পলিটান আৰক্ষীয়ে ৰাষ্ট্ৰীয় পাৰ্ক আৰক্ষী আৰু ডিপ্ল’মেটিক নিৰাপত্তা সেৱাৰ সদস্যৰ সৈতে প্ৰতিমূৰ্তিটো পৰিদৰ্শন কৰি তদন্ত প্ৰক্ৰিয়া আৰম্ভ কৰে।
উল্লেখ্য যে, আমেৰিকাৰ মেইনিপলিত আৰক্ষীয়ে এজন কৃষ্ণাংগ লোকক হত্যা কৰাৰ পিছত বৰ্ণবৈষম্যৰ বিৰুদ্ধে সমগ্ৰ আমেৰিকাজুৰি হিংসাত্মক প্ৰতিবাদী কাৰ্যসূচীয়ে সৰ্বাত্মক ৰূপ ধাৰণ কৰিছিল।
প্ৰতিবাদকাৰী বহু ৰাজহুৱা সম্পদ ধ্বংসও কৰিছে।
আনকি ৱাশ্বিংটন ডিচিস্থিত ঐতিহাসিক গীৰ্জা, লিংকনৰ স্মাৰকৰ লগতে বহু ৰাষ্ট্ৰীয় স্মাৰকত প্ৰতিবাদকাৰীয়ে অগ্নি সংযোগ কৰিছিল।
সন্দেহ কৰা হৈছে যে কোনো প্ৰতিবাদকাৰীয়ে প্ৰতিবাদৰ মাজতে মহাত্মা গান্ধীৰ প্ৰতিমূৰ্তিটো অনিষ্ট কৰাৰ চেষ্টা কিৰিছিল।
উল্লেখ্য যে মহাত্মা গান্ধীৰ প্ৰতিমূৰ্তিটো ২০০০ চনৰ ১৬ ছেপ্তেম্বৰৰ দিনা ভাৰতৰ তদানীন্তন প্ৰধানমন্ত্ৰী অতল বিহাৰী বাজপেয়ীয়ে তেতিয়াৰ মাৰ্কিন ৰাষ্ট্ৰপতি বিল ক্লিন্টনৰ উপস্থিতিত মাৰ্কিন দেশবাসীলৈ উছৰ্গা কৰিছিল।
