বনৰীয়া হাতীৰ উপদ্ৰৱৰ পৰা পৰিত্ৰাণ বিচাৰি কৃষকে পাতিলে গনেশ পূজা
বনৰীয়া হাতীৰ উপদ্ৰৱৰ পৰা পৰিত্ৰাণ বিচাৰি চামগুৰিৰ হাঁহচৰা বৰালী গাঁৱৰ পথাৰত সোমবাৰে নিশা স্থানীয় কৃষক ৰাইজে অনুষ্ঠিত কৰিলে এভাগ গনেশ পূজা।
বিশাল ধাননি খনৰ মাজৰ পথাৰৰ আলিত আয়োজিত এই পূজাত কৃষক সকলে ধূপ-দীপ, নৈবদ্যৰে সেৱা লয়।
বিগত এসপ্তাহ ধৰি হাতী খেদাৰ নামত বন বিভাগে কেইজনমান বনৰক্ষী পঠিয়ায়ে দায়িত্ব সামৰা হাঁহচৰা বৰালী গাঁৱৰ কৃষকৰ দুখ-দুৰ্দশাৰ এতিয়া শেষ ভৰষা গণেশ দেৱতা।
পূজা-পাৰ্বণ আৰু ৰাইজৰ মন্তব্যই একপ্ৰকাৰে চৰকাৰৰ বিয়াগোম বিভাগৰ ফোপোলা স্বৰূপটোহে উদঙাই দেখুৱালে।
উল্লেখযোগ্য যে, উদমাৰি উপ-খণ্ড বন বিষয়াৰ কাৰ্যালয়ৰ অন্তৰ্গত ধাননি পথাৰ খনত বিগত এসপ্তাহ ধৰি বনৰীয়া হাতীৰ এটা জাকে কৃষকৰ চকুৰ সন্মুখতে বিঘাই-বিঘাই ধান খেতি খাই তহিলং কৰিছে।
কৃষকৰ অশেষ কষ্টৰ খেতিডৰা এনেদৰে হাতীয়ে অনিষ্ট কৰাৰ পাছতো বন বিভাগে কোনো ব্যৱস্থা গ্ৰহণ কৰিব নোৱাৰাক লৈ এতিয়া তীব্ৰ অসন্তুষ্টি প্ৰকাশ কৰিছে স্থানীয় ৰাইজে।