তিনিচুকীয়া জিলাৰ মাৰ্ঘেৰিটা মহকুমাৰ লেখাপানী আৰক্ষী থানাৰ অন্তৰ্গত লংটং চেমা গাঁৱৰ নিবাসী তথা সদৌ অসম চৰকাৰী গাওঁবুঢ়া সন্থাৰ প্ৰাক্তন সভাপতিৰ উপৰি টিৰাপ স্বায়ত্ত শাসিত জিলা পৰিষদ দাবী সমিতিৰ সক্ৰিয় সদস্য, ৮ জনগোষ্ঠীয় উন্নয়ন পৰিষদৰ সদস্য হখেত‘ চেমাই আজি আকস্মিক ভাবে মৃত্যুক আঁকোৱালি লয়।
প্ৰায় ৬০ বছৰীয়া সৰবৰহী ব্যক্তিজনৰ আজি দিনৰ দুই মান বজাত শেষ নিশ্বাস ত্যাগ কৰে।
সদৌ অসম গাঁওবুঢ়া সন্থাৰ প্ৰাক্তন সভাপতি গৰাকীৰ আজি দিনৰ ভাগত হঠাৎ অসুস্থ হৈ পৰাত তেওঁক চিকিৎসালয়ৰ দিশে নি থকা অৱস্থাত আধা বাটতে মৃত্যু হোৱা বুলিও উল্লেখ কৰে পৰিয়ালৰ সূত্ৰই।
মৃত্যুৰ সময়ত লোকজনে পত্নী, পুত্ৰ, বোৱাৰী, জীয়াৰী, নাতি, নাতিনী সহিতে বহু আত্মীয় স্বজনক এৰি গৈছে।
অঞ্চলটোৰ প্ৰায় সকলোবোৰ অনুষ্ঠান প্ৰতিষ্ঠানৰ সৈতে জড়িত থকা লোকজনৰ মৃত্যুত সমগ্ৰ মাৰ্ঘেৰিটা মহকুমা অঞ্চলটোতে এক গভীৰ শোকৰ ছাঁ পৰে।
সদৌ অসম গাঁওবুঢ়া সন্থা, মাৰ্ঘেৰিটাৰ বিধায়ক ভাস্কৰ শৰ্মা, অসম চৰকাৰৰ ছাত্ৰ যুৱ কল্যাণ উপদেষ্টা সমিতিৰ সচিব লক্ষ্য কোঁৱৰ, ৮ জনগোষ্ঠী উন্নয়ন পৰিষদ অধ্যক্ষ মানজে লা, টিৰাপ স্বায়ত্ত শাসিত জিলা দাবী সমিতি, তিনিচুকীয়া জিলা সাংবাদিক সন্থাৰ সম্পাদক ৰাণাজ্যোতি নেওগ আদিয়ে চেমাইৰ মৃত্যুত সোক প্ৰকাশ কৰিছে।
মাৰ্ঘেৰিটা সাংবাদিক সংস্থাৰ মুখপাত্ৰ মানস প্ৰতিম গগৈ, বিশিষ্ট লেখক ৰাজীৱ নিংখী, সদৌ মান (টাইভাষী) ছাত্ৰ সন্থা, সদৌ চিংফৌ ছাত্ৰ সন্থা, সদৌ অসম টাংছা ছাত্ৰ সন্থা, সদৌ অসম চেমা ছাত্ৰ সন্থা, টিৰাপ ট্ৰাইবেল উইমেন ফ’ৰাম, চিংফৌ জাতীয় পৰিষদ, টাংছা জাতীয় পৰিষদ, চেমা জাতীয় পৰিষদ, টাইফাকে জাতীয় পৰিষদকে ধৰি বিভিন্ন অনুষ্ঠান প্ৰতিষ্ঠান দল সংগঠনে সদৌ অসম চৰকাৰী গাঁওবুঢ়া সন্থাৰ প্ৰাক্তন সভাপতি হখেত‘ চেমাইৰ মৃত্যুত গভীৰ শোক প্ৰকাশ কৰাৰ লগতে তেওঁৰ শোক সন্তপ্ত পৰিয়াল বৰ্গলৈ গভীৰ সমবেদনা জ্ঞাপন কৰে।
হেখত’ চেমাইৰ মৃত্যুৱে মাৰ্ঘেৰিটাৰ টিৰাপ মৌজাৰ জনগোষ্ঠীয় ক্ষেত্ৰৰ বাবে এক অপূৰণীয় ক্ষতি বুলি বিবেচিত হৈছে।
