ধৰ্মীয় সংখ্যালঘু বসতি প্ৰধান অঞ্চলত নিষিদ্ধ নহয় কলিয়াবৰ লোক সভা সমষ্টিৰ কংগ্ৰেছ প্ৰাৰ্থী তথা বৰ্তমানৰ সাংসদ গৌৰৱ গগৈ। সাংসদজনৰ বিৰুদ্ধে সদৌ অসম সংখ্যালঘু ছাত্ৰ সন্থা (আমছু)ই তেনেকুৱা কোনো সিদ্ধান্ত গ্ৰহণ কৰা নাই।
কলিয়াবৰ সমষ্টিৰ কংগ্ৰেছৰ প্ৰাৰ্থীজনৰ গোলাঘাট জিলাৰ সংখ্যালঘু অধ্যুষিত এলেকাত আমছুৱে প্ৰৱেশ নিষিদ্ধ কৰিছে বুলি একাংশ সংবাদ মাধ্যমত ওলোৱা খবৰ সন্দৰ্ভত নৰ্থ-ইষ্ট নাওক আজি এইদৰে স্পষ্ট কৰি দিছে সংগঠনটোৰ উপদেষ্টা আজিজুৰ ৰহমানে।
“গৌৰৱ গগৈৰ বিৰুদ্ধে তেনে সিদ্ধান্ত আমছুৰ কেন্দ্ৰীয় সমিতিয়ে লোৱা নাই। কেৱল গোলাঘাট জিলা সমিতিৰ এজন সদস্যইহে এই মন্তব্য কৰিছে। সেয়া তেওঁৰ ব্যক্তিগত মন্তব্য, আমাৰ সংগঠনৰ মন্তব্য নহয়”, সাংসদজনৰ সংখ্যালঘু বসতিপ্ৰধান অঞ্চলত প্ৰৱেশ নিষেধ কৰাৰ বাবে আমছুৰ গোলাঘাট জিলা সমিতিয়ে সিদ্ধান্ত লোৱা বুলি প্ৰকাশিত বাতৰিটো সন্দৰ্ভত নৰ্থ-ইষ্ট নাওক আজিজুৰ ৰহমানে কয়।
গোলঘাট জিলা আমছুৰ সাধাৰণ সম্পাদক বাবুল আলী হাজৰিকাই গোলাঘাটৰ সংখ্যালঘু বসতি প্ৰধান অঞ্চলত সাংসদ তথা কংগ্রেছৰ এইবাৰৰো প্ৰাৰ্থী গৌৰৱ গগৈৰ প্ৰৱেশত বাধা দিব ২৯ মাৰ্চত সংবাদ মাধ্যমত বাতৰি প্ৰকাশ পাইছিল।
কিন্তু ইয়াৰ বিপৰীতে সংগঠনটোৰ উপদেষ্টাজনে নাগৰিকত্ব সংশোধনী বিধেয়কৰ সমৰ্থক বিজেপি আৰু মিত্ৰদল অগপকহে বৰ্জনৰ বাবে ৰাইজক আহ্বান জনায়।
আমছুৰ উপদেষ্টাজনৰ সৈতে হোৱা আমাৰ সাংবাদিকৰ বাৰ্তালাপত তেওঁ আগন্তুক লোকসভা নিৰ্বাচনত অসম আৰু অসমীয়াৰ স্বাৰ্থত কাম কৰা ধৰ্ম নিৰপক্ষে আৰু গণতান্ত্ৰিক দল বা ব্যক্তিক ভোট দি জয়যুক্ত কৰোৱাৰ বাবে ৰাইজক আহ্বান জনায়। এই সন্দৰ্ভত সংগঠনটোৱে আজি ৩১ মাৰ্চত এখন বৈঠক অনুষ্ঠিত কৰি প্ৰস্তাৱ লোৱা বুলিও জানিবলৈ দিয়ে।
অৱশ্যে, কোনো দল বা প্ৰাৰ্থী বিশেষৰ কথা নকৈ তেওঁ ৰাইজক বিবেচনা কৰি ভোটদান কৰিবলৈ আহ্বান জনায়।
“হিন্দু-মুছলমানৰ নামত বিভাজনৰ ৰাজনীতি কৰা দলক নিৰ্বাচনত পৰাভূত কৰিব লাগে”, আগন্তুক নিৰ্বাচনৰ পৰিপ্ৰেক্ষিতত ভোটাৰলৈ আহ্বান ৰহমানৰ।
উল্লেখ্য যে, ইয়াৰ পূৰ্বে যোৱা ২২ মাৰ্চত এ আই য়ু ডি এফকো সাম্প্ৰদায়িক ৰাজনীতি কৰা দল বুলি অভিহিত কৰি দলটোক বৰ্জনৰ বাবে অসমৰ ৰাইজক আহ্বান জনাইছিল আমছুৱে।
