এইবাৰ বাংলাদেশক বিদ্যুত বিক্ৰী কৰিব গৌতম আদানীয়ে, দিল্লীত হাছিনাক কৰিলে সাক্ষাৎ

বিমান বন্দৰ, বন্দৰ আদিৰ লগতে আন কেইবাটাও খণ্ডত বিনিয়োগ কৰি কোটি কোটি টকা অৰ্জন কৰা এছিয়াৰ আটাইতকৈ ধনী ব্যক্তি গৌতম আদানী এইবাৰ বাংলাদেশক বিক্ৰী কৰিব বিদ্যুৎ। শেহতীয়াকৈ ৫ ছেপ্টেম্বৰত চাৰিদিনীয়া ভ্ৰমণসূচীলৈ ভাৰতলৈ অহা বংলাদেশৰ প্ৰধানমন্ত্ৰী শ্বেখ হাছিনাক আদানীয়ে সাক্ষাৎ কৰিছে আৰু বাংলাদেশলৈ বিদ্যুৎ ৰপ্তানিৰ বিষয়ত সিদ্ধান্ত গ্ৰহণ কৰিছে।

২০২২ বৰ্ষৰ শেষৰ পিনে আদানীয়ে পূৱ ভাৰতৰ এটা কয়লাচালিত প্ৰকল্পৰ পৰা বাংলাদেশলৈ বিদ্যুৎ ৰপ্তানি কৰাৰ পৰিকল্পনা কৰিছে। আদানীৰ এনে পদক্ষেপৰ ফলত দক্ষিণ এছিয়াৰ দেশখন বাংলাদেশত শক্তিৰ অভাৱ দূৰ কৰাত সহায়ক হ’ব বুলি ধাৰণা কৰা হৈছে। আদানি পাৱাৰ লিমিটেডে ঝাৰখণ্ডত ১.৬ গিগাৱাট শক্তি উৎপাদনৰ ক্ষমতা সম্পন্ন প্ৰকল্পটো আৰম্ভ কৰিব।

প্ৰকল্পটোৰ পৰা চলিত বৰ্ষৰ ১৬ ডিচেম্বৰৰ ভিতৰত বিদ্যুৎ ৰপ্তানিৰ বাবে এক ট্ৰেন্সমিচন লাইনো আৰম্ভ কৰিব। আদানীয়ে নতুন দিল্লীত বাংলাদেশৰ প্ৰধানমন্ত্ৰী শ্বেখ হাছিনাক সাক্ষাৎ কৰাৰ পিছত টুইটাৰ এই কথা প্ৰকাশ কৰিছে।এই প্ৰকল্পটোৱে চুবুৰীয়া দেশ বাংলাদেশৰো বিদ্যুৎ সংকট দূৰ কৰিবলৈ সক্ষম হ’ব বুলি আদানীয়ে আশা প্ৰকাশ কৰে।বন্দৰ, আন্তঃগাঁথনি আৰু শক্তি খণ্ডৰ ব্যৱসায়িক সাম্ৰাজ্য বিস্তাৰ কৰি যোৱা এছিয়াৰ আটাইতকৈ ধনী ব্যক্তি আদানিয়ে শ্ৰীলংকাতো বিনিয়োগ কৰিছে।

ইউক্ৰেইন- ৰাছিয়াৰ যুদ্ধৰ বাবে বাংলাদেশত কয়লাৰ লগতে আন ইন্ধনৰ মূল্য বৃদ্ধি হোৱাৰ ফলত বিদ্যুতৰ নাটনি হৈছে।সেয়ে এই ক্ষেত্ৰত আদানীৰ সহায় বিচাৰিছে বাংলাদেশে।উল্লেখ্য আদানি গ্ৰুপৰ অধ্যক্ষ গৌতম আদানি বিশ্বৰ তৃতীয় ধনী ব্যক্তি হিচাপে পৰিগণিত হৈছে । মুঠ ১৩৭.৪ বিলিয়ন মাৰ্কিন ডলাৰৰ সম্পত্তিৰে ৬০ বছৰীয়া আদানিয়ে লুই ভিটনৰ অধ্যক্ষ আৰ্ন’ল্টৰ সম্পদক অতিক্ৰম কৰিছে।